გიორგი ჭანტურია ჩემს ქმარს ფულს სთხოვდა, – ამის შესახებ რუსთავის საქალაქო სასამართლოში გენერალ სამსონ ქუთათელაძის მეუღლემ, მეგი სირბილაძემ დაკითხვისას განაცხადა.
მისი თქმით, გიორგი ჭანტურიას სურდა, სამსონ ქუთათელაძისთვის მიწის ნაკვეთი მიეყიდა, რისთვისაც ქუთათელაძე კრედიტის გამოტანას აპირებდა.
„ჩემმა ქმარმა მითხრა, კრედიტი უნდა ავიღოო. რა კრედიტი, რად გინდა ამდენი კრედიტი-მეთქი, ვუთხარი და მიპასუხა, მირჩევნია, ჭანტურიასგან ვიყიდო წილი, თვითონ შემომთავაზაო. მოსიარულე შარიაო, წავა და დავისვენებო.
ჭანტურია რომ ამბობს, მიზეზი არ მქონდაო, მას ნამდვილად ჰქონდა მიზეზი, ჩემი ქმარი მოეკლა. ფულს სთხოვდა, რადგან თავისი ფინანსური პრობლემების გამო სჭირდებოდა ეს ფული. გადაწყვიტა, რომ სოსოსთვის მიეყიდა მიწა. მერე გაუბრაზდა, ჩემი დის წილიც იყიდეო. მოთხოვნებს უყენებდა. ეს პრობლემები მოგვარებული არ იყო, ცივი ომი მიდიოდა მათ შორის. არის მოთამაშე და ნარკომანი. სოსო კერკეტი კაკალი იყო. ჭანტურიას მიზანი იყო სოსო მოეშორებინა, რომ მისი შვილისკენ გადაედგა ნაბიჯი, რათა მისთვის წაერთმია, სოსოსთვის რისი წართმევაც ვერ მოახერხა“, – განაცხადა მეგი სირბილაძემ.
შეგახსენებთ, რომ გიორგი ჭანტურია 7 აგვისტოს დააკავეს. მისი სახლის ჩხრეკისას სამი ავტომატი, 500 ვაზნა და 24 მჭიდი ამოიღეს. ის ბრალს არ აღიარებს.
გამოძიების ინფორმაციით, ბრალდებული მიმდინარე წლის 15 იანვარს რუსთავში, ე.წ. სტამბულის ბაზრის ადმინისტრაციულ შენობაში გენერალ სამსონ ქუთათელაძესთან ერთად შევიდა, რომელთანაც მას დიდი ხნის განმავლობაში დაპირისპირება ჰქონდა. შსს-ს ცნობით, შენობაში ბრალდებულსა და სამსონ ქუთათელაძეს შორის ფინანსურ საკითხებთან დაკავშირებით მოხდა შელაპარაკება, რის შემდეგაც ბრალდებულმა ცეცხლსასროლი იარაღიდან გასროლით სამსონ ქუთათელაძეს რამდენიმე ჭრილობა მიაყენა და შენობა დატოვა. ქუთათელაძე მიყენებული ჭრილობების შედეგად, ადგილზე გარდაიცვალა.
