რუსთავის საქალაქო სასამართლოში გენერალ სამსონ ქუთათელაძის მკვლელობის საქმის გამოძიების ფარგლებში დაკავებული გიორგი ჭანტურიას სასამართლო სხდომა მიმდინარეობს.
დღევანდელ სასამართლო პროცესზე სამსონ ქუთათელაძის მეუღლე, მეგი სირბილაძე დაკითხეს.
მისი ჩვენებით, დაკავებულ ჭანტურიას მის მეუღლესთან კონფლიქტი ჰქონდა და ფიქრობს, რომ სამსონ ქუთათელაძე სწორედ გიორგი ჭანტურიამ მოკლა. როგორც ის აღნიშნავს, ბაზრობის სხვა მეწილეებთან სამსონ ქუთათელაძეს კარგი ურთიერთობა ჰქონდა, ნათესაური და კარგი ურთიერთობა ჰქონდათ ასევე დირექტორ მამუკა ცხოვრებაძესთან.
შეგახსენებთ, რომ გიორგი ჭანტურია 7 აგვისტოს დააკავეს. მისი სახლის ჩხრეკისას სამი ავტომატი, 500 ვაზნა და 24 მჭიდი ამოიღეს. ის ბრალს არ აღიარებს.
გამოძიების ინფორმაციით, ბრალდებული მიმდინარე წლის 15 იანვარს რუსთავში, ე.წ. სტამბულის ბაზრის ადმინისტრაციულ შენობაში გენერალ სამსონ ქუთათელაძესთან ერთად შევიდა, რომელთანაც მას დიდი ხნის განმავლობაში დაპირისპირება ჰქონდა. შსს-ს ცნობით, შენობაში ბრალდებულსა და სამსონ ქუთათელაძეს შორის ფინანსურ საკითხებთან დაკავშირებით მოხდა შელაპარაკება, რის შემდეგაც ბრალდებულმა ცეცხლსასროლი იარაღიდან გასროლით სამსონ ქუთათელაძეს რამდენიმე ჭრილობა მიაყენა და შენობა დატოვა. ქუთათელაძე მიყენებული ჭრილობების შედეგად, ადგილზე გარდაიცვალა.
