ოთარ ფარცხალაძისთვის წაყენებული მუხლი თავისი სანქციით და შინაარსით არასაპატიმრო ღონისძიების გამოყენების შესაძლებლობას ითვალისწინებს, – ამის შესახებ პარლამენტის იურიდიული კომიტეტის თავმჯდომარე ეკა ბესელიამ ოთარ ფარცხალაძისთვის ბრალის წაყენებასთან დაკავშირებით განაცხადა.
მისი თქმით, მთავარია, საგამოძიებო პროცესი არ ტოვებდეს კითხვის ნიშნებს და საზოგადოების ინფორმირება პოლიტიკური მიკერძოების გარეშე მოხდეს.
„სასამართლო რომელ ღონისძიებას გამოიყენებს და რა აღმკვეთ ღონისძიებას შეუფარდებს, ამაში ჩვენ ვერ ჩავერევით. მთავარია, ეს საგამოძიებო პროცესი არ ტოვებდეს კითხვის ნიშნებს და პოლიტიკური მიკერძოების გარეშე უნდა მოხდეს საზოგადოების ინფორმირება. რატომ დაინიშნა სასამართლო პროცესი ადრე, ამაზე ვფიქრობ, შეკითხვები პოლიტიკოსებს არ უნდა დავუსვათ, რადგან ჩვენ არ განვსაზღვრავთ სასამართლო როდის დანიშნავს სხდომას. ამ კითხვებზე სასამართლო გააკეთებს ალბათ განმარტებას. სასამართლო პროცესი 05:00 საათზე დაინიშნება, თუ დღის რომელიმე მონაკვეთში, არავინ ამას პოლიტიკურ ორგანოს არ და ვერ შეუთანხმებს”, – განაცხადა ბესელიამ.
