გორში, 8 წლის გოგონას მკვლელობაში ბრალდებულ იაგო ნებიერიძის მამა დღეს, შესაძლოა, გამოკითხონ.
თუ რა ჩვენებას მისცემს ის საგამოძიებო ორგანოს წარმომადგენლებს, ეს ჯერ უცნობია.
შეგახსენებთ, რომ 25 ოქტომბერს, გაუჩინარებული 8 წლის გოგონა, იმავე საღამოს გარდაცვლილი იპოვეს. ბავშვის ცხედარი სამართალდამცავებმა წმინდა წყლის დასახლების ტერიტორიაზე, მდინარე ლიახვის ნაპირას ნახეს. შინაგან საქმეთა სამინისტრომ გოგონას სასტიკ მკვლელობაში ბრალდებული გორში 26 ოქტომბერს დააკავა. 1984 წელს დაბადებული ბრალდებული წარსულში ნასამართლევია.
ნებიერიძეს ბრალი სისხლის სამართლის კოდექსის 109-ე მუხლის მე-2 ნაწილის „ბ“ ქვეპუნქტით წარედგინა, რაც წინასწარი შეცნობით არასრულწლოვნის მიმართ დამამძიმებელ გარემოებაში ჩადენილ განზრახ მკვლელობას გულისხმობს. მას მოგვიანებით, ბრალი არასრულწლოვნის მიმართ გარყვნილი ქმედებისთვის დაუმძიმდა.
