ვაშინგტონში პალესტინა-ისრაელს შორის პირდაპირი სამშვიდობო მოლაპარაკებათა პირველი რაუნდის გახსნის ოფიციალური ცერემონიალი გაიმართა. ცერემონიალი ისრაელის პრემიერ-მინისტრის ბენიამინ ნეთანიაჰუს, პალესტინის ლიდერის მაჰმუდ აბასის, ბარაკ ობამას სპეციალური წარმომადგენლის ჯორჯ მიტჩელისა და აშშ-ს სახელმწიფო მდივნის ჰილარი კლინტონის განცხადებებით გაიხსნა.
პირველი სიტყვით აშშ-ს სახელმწიფო მდივანი ჰილარი კლინტონი გამოვიდა, რომელმაც განაცხადა, რომ მოლაპარაკებები ურთიერთუნდობლობისა და ისრაელის წინააღმდეგ განხორციელებული ორი ტერაქტის ფონზე იწყება. "ამასთან ერთად თავად ფაქტი მოლაპარაკებების დაწყებისა უკეთესი მომავლის იმედს იძლევა", _ განაცხადა კლინტონმა. მან ასევე განაცხადა, რომ სამშვიდობო პროცესის მოწინააღმდეგეები გააკეთებენ ყველაფერს იმისათვის, რომ ეს სამშვიდობო პროცესი ჩაშალონ.
კლინტონმა მადლობა გადაუხადა მაჰმუდ აბასსა და ბენიამინ ნეთანიაჰუს იმისათვის, რომ "მათ იპოვეს თავის თავში მამაცობა მოლაპარაკებების დასაწყებად". მისივე თქმით, თუ ნეთანიაჰუ და აბასი ვაშინგტონში გამართულ მოლაპარაკებებზე წინ წაწევას შეძლებენ ყველა საკვანძო საკითხის გადაჭრა ერთი წლის განმავლობაში მოხერხდება.
"თქვენ ხელში გაქვთ თქვენი ხალხებისა და ოჯახების ბედი", _ მიმართა კლინტონმა აბასსა და ნეთანიაჰუს.
ამის შემდეგ სიტყვით ისრაელის პრემიერ-მინისტრი ბენიამინ ნეთანიაჰუ გამოვიდა და განაცხადა, რომ არის სურვილი რეგიონში მშვიდობის მოტანისა და რომ დღეს გაჩნდა შესაძლებლობა შეთანხმების გაფორმება, რომელიც კონფლიქტს დაასრულებს.
"ნამდვილი მშვიდობა შესაძლებელია მხოლოდ და მხოლოდ მას შემდეგ, რაც ორივე მხარე სერიოზულ და მძიმე დათმობებზე წავა. ისრაელის ხალხი და მთავრობა მზადაა ამისათვის მშვიდობის, უსაფრთხოების, აღორძინებისა და კეთილმეზობლური ურთიერთობების გულისათვის", _ განაცხადა მან.
მისივე თქმით, საჭიროა სერიოზული მოლაპარაკებების გამართვა უთანხმოებების დასაძლევად. მან განაცხადა, რომ ისრაელი მზადაა აღიაროს პალესტინური სახელმწიფო და სთხოვს მეორე მხარეს აღიაროს ისრაელი ებრაულ სახელმწიფოდ", და დასძინა, რომ "რეგიონში მშვიდობის მისაღწევად ორივე მხარეს მტკივნეულ დათმობებზე წასვლა მოუწევთ".
"პრეზიდენტო აბას, მე სავსებით მესმის თქვენი ხალხის სწრაფვა სუვერენიტეტის მოპოვების საკითხში. ჩვენ თქვენგან ველით ისრაელის აღიარებას, როგორც ებრაელი ხალხის ნაციონალური სახელმწიფოსი. შესაძლოა ამან შეარიგოს პალესტინური სახელმწიფო ისრაელთან", _ განაცხადა ნეთანიაჰუმ.
მისივე თქმით, "აუცილებელია მთელი მსოფლიოს ხალხებმა დაინახონ, რომ კონფლიქტი დასრულდა. მე და აბასს მოგვეცა ისტორიული შესაძლებლობა დავასრულოთ ეს კონფლიქტი და სისხლისღვრა", _ განაცხადა ისრაელის პრემიერმა.
თავის მხრივ, პალესტინის ლიდერმა მაჰმუდ აბასმა სიტყვით გამოსვლისას მადლობა გადაუხადა აშშ-ს მშვიდობიანი მოლაპარაკებების განახლებისათვის, რომელთა მსვლელობისას, ერთ წლის განმავლობაში შეთანხმების გაფორმება უნდა მოხერხდეს.
მისივე თქმით, ეს სამშვიდობო შეთანხმება საერთაშორისო სამართლის, კვარტეტის, არაბეთის სადამკვირვებლო კომისიის პრინციპებს უნდა ემყარებოდეს და ასვე მან უნდა მიიღოს საერთაშორისო აღიარება.
პალესტინის ლიდერმა მაჰმუდ აბასმა ასევე განაცხადა, რომ პალესტინელი ლიდერები მზად არიან შეასრულონ ვალდებულებები უსაფრთხოების საკითხთან მიმართებაში და ანტიისრაელური პროპაგანდა შეწყვიტონ, თავის მხრივ კი ისრაელმა უნდა შეწყვიტოს დასახლებებში მშენებლობები, მოხსნას ბლოკადა ღაზას სექტორზე და ისრაელის ციხეებიდან პალესტინელი ტერორისტები გაათავისუფლოს.
