სუპერმარკეტების ქსელის „ფრესკოს“ დამფუძნებელი ვასილ სოფრომაძე ფინანსთა სამინისტროს ზეწოლაში ადანაშაულებს. როგორც ბიზნესმენმა დღეს გამართულ ბრიგინგზე განაცხადა, მის წინააღმდეგ სახელმწიფო უწყების მიერ ხდება კონკრეტული დავალების შესრულება, რასაც ის „ფულის გამოძალვად“ აფასებს.
„აბსოლუტურად, სამართლებრივი ზონიდან გავიდა საგადასახადო. აბსოლუტურად აბსურდული, გაუგებარი, გაუაზრებელი, არაკომპეტენტური ქმედებებით ცდილობენ კომპანიაზე ფულის გამოძალვას, მე სხვანაირად ამას არ აღვიქვამ, რაზეც გადახდილი გვაქვს მილიონი ლარი, რაც უკვე გადახდილია, დამტკიცებულია, იმაზე კიდევ ერთხელ ითხოვენ გადახდას. დიახ, ეს არის ბიზნესზე ზეწოლა, უბრალოდ ახლა ნამეტანი კოსმოსში გავიდნენ, ეს არ ხდება მარტო დღეს, უკვე ორი-სამი წელიწადია, კომპანიის მიმართ ხდება გარკვეული ქმედებები, მაგრამ სანამ მთლიანად სამართლებრივი სივრციდან არ გავიდნენ, ხმა არ ამოგვიღია. ნებისმიერი შავი პიარის დაწყებამდე, მე ვღებულობ წინადადებას კომპანიის გაყიდვის. მე ყოველთვის ვამბობ იმას, კომპანია "ფრესკო" არ იყიდება.
ბატონები სინდისი გაქვთ, „ვაფშე“ გესმით, რას ამბობთ? საერთოდ ხართ გაგებაში? გეკითხებით, თქვენ, გესმით რასაც ამბობთ? ვერაფერს ვერ მიიღებთ ჩემგან, ვერაფერი ვერ მიგიღიათ და ვერაფერს ვერ მიიღებთ ჩემგან. არ მაინტერესებს, ვინ გაიმარჯვებს არჩევნებში, მე არც იმ მთავრობასთან ვმეგობრობდი და არც თქვენთან არ ვმეგობრობ და არც ვინც არ უნდა მოვიდეს, არ ვაპირებ მეგობრობას, იმიტომ, რომ ჩემი წარმატების საფუძველი, ზუსტად იმაშია, რომ მე არ ვმეგობრობ მთავრობასთან და ვიხდი გადასახადებს,“ - განაცხადა ვასილ სოფრომაძემ.
სოფრომაძე ამბობს, რომ მის ბიზნესზე ზეწოლა და მისი ქონების დაყადაღება არჩევნებამდე ორი დღით ადრე ხდება, ამას კი ბიზნესმენი უკავშირებს იმას, რომ ის ხელისუფლებასთან არ მეგობრობს.
სოფრომაძე ამბობს, რომ ის არაფრის გადახდას არ აპირებს.
