დღეს, 26 ოქტომბერს, 15:00 საათზე, თემქაზე მოკლული 20 წლის ანა ნაცვლიშვილის მამა, მამუკა ნაცვლიშვილი ადვოკატთან, მაია ქავთარაძესთან ერთად პრესკონფერენციას გამართავს.
როგორც მამუკა ნაცვლიშვილი და მისი ადვოკატი აცხადებენ, დაცვის მხარის მიერ დანიშნული ალტერნატიული ექსპერტიზა მათთვის ეჭვის საბაბი გახდა, რადგან მათივე განმარტებით, საკვლევი ობიექტის წარდგენამდე და ექსპერტიზის დაწყებამდე, ბრალდებულ ლადო გრიგალაშვილის ადვოკატმა დაანონსა, რომ ის პროკურატურის მიერ წარმოდგენილი მტკიცებულებების საწინააღმდეგო ექსპერტიზის დასკვნას წარმოდგენდა სასამართლოში.
ცნობისთვის, ბრალდების მხარის მიერ წარმოდგენილი ექსპერტიზის დასკვნის თანახმად, ანა ნაცვლიშვილს 33 ჭრილობა ჰქონდა მიყენებული, აქედან სიკვდილი 14-მა ნაკვეთ-ნაჩხვლეტმა ჭრილობამ განაპირობა, რომელიც გარდაცვლილს კისრის მიდამოში აღენიშნებოდა. ამასთანავე, ექსპერტიზის დასკვნის თანახმად, გოგონას სიცოცხლისთვის საშიში 7 ჭრილობა აღენიშნებოდა თავის არეშიც.
დაცვის მხარისთვის კი, პროკურატურის მიერ წარმოდგენილი ექსპერტიზის შედეგი არ არის დამაჯერებელი. როგორც ბრალდებულის ადვოკატი აცხადებს, მათ მიერ ჩატარებული ალტერნატიული ექსპერტიზით პასუხი გაეცემა კითხვას, მოხდა თუ არა მკვლელობა კონკრეტულად იმ დანით, რომელიც გამოძიებას აქვს ამოღებული.
ცნობისთვის, 20 წლის ანა ნაცვლიშვილის მკვლელობის საქმეზე მოკლულის შეყვარებული, ლადო გრიგალაშვილი დააკავეს, ის ჩადენილ დანაშაულს არ აღიარებს.
