ბარნოვზე, 25 წლის თაკო გამრეკელაშვილის მკვლელობის საქმეზე, რომელზეც მამიმაცვალი, ვეფხია ბაქრაძეა ბრალდებული, დღეს სასამართლოში ექსპერტიზის დასკვნები წარადგინეს.
საქმის პროკურორის, გია შაიშმელაშვილის განმარტებით, სასამართლოში წარდგენილი ექსპერტიზის დასკვნებით, ბრალდებული შემთხვევის ადგილზე იმყოფებოდა. ასევე, დანაშაულის ჩადენის იარაღზე მოკლულის სისხლია ამოსული.
"ექსპერტიზის ორი დასკვნა წარმოვადგინეთ, ეს არის ბიოლოგიური, ანუ გენეტიკური ექსპერტიზის დასკვნა, რომლითაც დადგენილია, რომ ბრალდებული შემთხვევის ადგილზე იმყოფებოდა. ასევე დადგენილია, დანები, რომელიც შემთხვევის ადგილიდან ამოღებულია და ეკუთვნის ბრალდებულს, გარდაცვლილის სისხლია.
ასევე, დადგენილია რომ ბრალდებულის ტანსაცნელზე, რომელიც ამოღებულია მისი ძმის საცხოვრებელი სახლის ჩხრეკისას, გარდაცვლილის სისხლია.
ასევე წარმოვადგინეთ ტრასოლოგიური ექსპსრტიზის დასკვნა, რომელიც ახლახანს მოვიპოვეთ. ტრასოლოგიური ექსპერტიზის დასკვნით დადგენილია, რომ ტანსაცმელზე აღინიშნება ზუსტად იმ ხასიათისა და კატეგორიის მექანიკური დაზიანებები, როგორი დანებიც გვაქვს ამოღებული. დაგენილია, რომ ტანსაცმელზე არსებული დაზიანებები შეესაბამება გარდაცვლილის სხეულზე არსებულ დაზიანებებს.
ასევე ფარული საგამოძიებო მოქმედების ოქმი გამოვიკვლიეთ, სადაც ბრალდებული დეტალურად აღწერს და მიუთითებს დანაშაულის ჩადენის ფაქტობრივ გარემოებებს.
ექსპერტიზის დასკვნები დაცვის მხარემ უდაოდ მიიჩნია", - აცხადებს შაიშმელაშვილი.
შეგახსენებთ, რომ თაკო გამრეკელაშვილი მიმდინარე წლის 13 აპრილს, თბილისში, ბარნოვის ქუჩაზე მოკლეს. მას ყელი ჰქონდა გამოჭრილი. აღნიშნულ დანაშაულზე სამართალდამცავებმა მოკლულის მამინაცვალი, ვეფხია ბაქრაძე 14 აპრილს, თელეთში დააკავეს. ის მიმალვაში იმყოფებოდა.
გამოძიება 11 პრიმა 109-ე მუხლით მიმდინარეობს, რაც ოჯახში ძალადობის ნიადაგზე ჩადენილ განზრახ მკვლელობას დამამძიმებელ გარემოებაში გულისხმობს. აღნიშნული მუხლი 16-დან 20 წლამდე ან უვადო პატიმრობას ითვალისწინებს.
სამართალდამცველებმა ბარნოვის ქუჩაზე მომხდარი მკვლელობის საქმეზე კიდევ ერთი პირი, ბრალდებულ ვეფხია ბაქრაძის ბიძაშვილი, თემურ ბაქრაძე დაკავეს. მას ბრალი დანაშაულის შეუტყობინებლობისსთვის აქვს წაყენებული. ჩადენილი დანაშაული 2-დან 4 წლამდე ვადით თავისუფლების აღკვეთას ითვალისწინებს.
სამედიცინო ექსპერტიზის დასკვნით, თაკო გამრეკელაშვილს აღენიშნებოდა 33 ჭრილობა, ასევე აღენიშნებოდა მრავალი სისხლნაჟღენთი დაზიანება. 33 ნაკვეთი-ნაჩხვლეტი ჭრილობიდან 8 კისრის არეში იყო შემავალი, 2 გულ-მკერდის არეში, დანარჩენი სხვადასხვა ადგილებზე. კისრის და ყელის არეში არსებულმა დაზიანებებმა გამოიწვია გარდაცვალება.
