ბათუმის საერთაშორისო საფეხბურთო სტადიონის სამშენებლო სამუშაოები ინტენსიურად მიმდინარეობს.
სტადიონის მშენებლობის პროცესს აჭარის ფინანსთა და ეკონომიკის მინისტრი ჯაბა ფუტკარაძე მოადგილეებთან თორნიკე კუჭავასთან და არჩილ ვანაძესთან ერთად გაეცნო. მიმდინარე სამუშაოების შესახებ ინფორმაცია მთავრობის წარმომადგენლებს სამშენებლო კომპანია „ანაგის“ პროექტების მმართველმა გოგა გუგავამ მიაწოდა.
ამ დროისთვის დასკვნით ეტაპზეა ბეტონის სამუშაოები. დაწყებულია ლითონის კონსტრუქციების მონტაჟი და სტადიონის გადახურვა. პარალელურად შიდა სამუშაოები მიმდინარეობს, რაც ტიხრების, ტრიბუნების, საკომუნიკაციო ქსელების მოწყობას, სტადიონის კედლების მონტაჟს და ფასადის მოპირკეთებას გულისხმობს.
საფეხბურთო სტადიონის მშენებლობის ზედამხედველობას ელქტრონულ ტენდერში გამარჯვებული კომპანია „სი ემ სი“ ახორციელებს.
სტადიონი UEFA-ს IV კატეგორიის სტანდარტებით შენდება და ის 20 000 მაყურებელზე იქნება გათვლილი.
სამუშაოებზე 400 ადამიანია დასაქმებული და ეს რაოდენობა კომპანიის განცხადებით 500-მდე გაიზრდება.
სტადიონი არქიტექტურული მემბრანით იქნება გადახურული. მაყურებელთა გადაადგილება დამცავი ბარიერებისა და მიმმართველი გამყოფი ლითონის მოაჯირების საშუალებით მოხდება.
სტადიონს რამდენიმე შესასვლელი ექნება: მედიის,ავტობუსების, სპორტსმენების და VIP.
ტერიტორიაზე დაახლოებით 1200 მანქანაზე გათვლილი პარკინგი მოეწყობა ხელშეკრულების მიხედვით, სტადიონის სამშენებლო სამუშაოები 34 თვეში, 2020 წლის სექტემბერში დასრულდება.
