საქართველოს სავაჭრო-სამრეწველო პალატა ეხმაურება მედიაში გავრცელებულ წერილს, რომლის მიხედვითაც თითქოს გაერთიანება ბიზნეს-სექტორს იწვევს ღონისძიებაზე: „საქართველო-ევრაზიული ეკონომიკური კავშირი“, რომელიც თბილისში 18-დან 21 ოქტომბრის ჩათვლით იმართება.
“გვინდა დავაფიქსიროთ, რომ საქართველოს სავაჭრო-სამრეწველო პალატას არანაირი მონაწილეობა არ მიუღია აღნიშნული ღონისძიების გამართვაში, არ ჩართულა საორგანიზაციო ნაწილში და ფორუმის შესახებ ბიზნეს-სუბიექტებში ინფორმაციაც კი არ გაუვრცელებია. წერილში აღნიშნული ინფორმაცია პალატის ჩართულობის შესახებ არის აბსოლუტურად მცდარი. ასევე მცდარია ინფორმაცია პალატის საბჭოს წევრის - საქართველოს დისტრიბუტორთა ბიზნეს-ასოციაციის ჩართულობის შესახებაც.
იმის მიუხედავად, რომ საქართველოს სავაჭრო-სამრეწველო პალატა არ ეწინააღმდეგება საქართველოს ბიზნეს-წრეების თანამშრომლობას სხვადასხვა ქვეყნების ბიზნეს-სუბიექტებთან, მაინც ხაზგასმით აღვნიშნავთ, რომ ზემოთხსენებულ ღონისძიებაში ჩვენი პალატა არანაირი მეთოდით ჩართული არ ყოფილა, რადგან არ ვეთანხმებით აღნიშნულ ფორმატს.
მივმართავთ ღონისძიების ორგანიზატორებს, აღმოფხვრან აღნიშნული უზუსტობა“, აცხადებენ სავაჭრო-სამრეწველო პალატაში.
