2010 წლის 1-ელ სექტემბერს საქართველოს იუსტიციის სამინისტროს ახალი შენობის პრეზენტაცია გაიმართა. ოფიციალურ ცერემონიაში საქართველოს პრემიერმინიტრი ნიკა გილაური და იუსტიციის მინისტრი ზურაბ ადეიშვილი მონაწილეობდნენ. სტუმრებს შორის იყვნენ საკანონმდებლო, აღმასრულებელი და სასამართლო ხელისუფლების, საქართველოში აკრედიტებული დიპლომატიური კორპუსის, აგრეთვე - საერთაშორისო ორგანიზაციებისა და მედიის წარმომადგენლები.
იუსტიციის სამინისტროს თანამშრომლებს პრემიერმინისტრმა ახალი შენობის გახსნა მიულოცა. მისასალმებელი სიტყვაში კი, იუსტიციის მინისტრმა ზურაბ ადეიშვილმა განაცხადა:
„ახალი შენობის გახსნით უზრუნველვყოფთ საჯარო მოხელეების უკეთეს სამუშაო პირობებს. ეს იმის საწინდარია, რომ სამინისტროში დაგეგმილი რეფორმები კიდევ უფრო წარმატებული იქნება. სულ მალე, საქართველოს ქალაქებში გაიხსნება იუსტიციის სახლები, რომლებიც მოქალაქეებს გამარტივებულ სახელმწიფო სერვისებს შესთავაზებს, ახალ ფაზაში შევა „საზოგადოებაზე ორიენტირებული პროკურორის" კამპანია, გაფართოვდება თანამშრომლობა სამოქალაქო სექტორთან..."

ცერემონიის დასასრულს, მინისტრმა იუსტიციის საზაფხულო სკოლის სტუდენტები დააჯილდოვა და პროფესიულ საქმიანობაში წარმატება უსურვა.
იუსტიციის სამინისტრო ორთაჭალაში, გორგასლის №24-შია განთავსდა. ოფისი უახლესი სამუშაო ინვენტარით აღიჭურვა, რაც უფრო ეფექტურს გახდის სამინისტროს, როგორც აღმასრულებელი ხელისუფლების შემადგენელი რგოლის ფუნქციონირებას.