რუსთავის საქალაქო სასამართლოში მარნეულის ყოფილი მერის, თემურ აბაზოვის საქმის არსებითი განხილვა გაიმართა.
დღევანდელ სხდომაზე ბრალდების მხარის მიერ წარდგენილი ორი მოწმე გამოიკითხა.
როგორც აბაზოვის ადვოკატი, გაგი მოსიაშვილი აცხადებს, აბაზოვისთვის ბრალის დამტკიცება ვერ მოხდება.
"ფიზიკურად შეუძლებელია ბრალის დადასტურება. რა ინფორმაციაც მოგვაწოდეს მოწმეებმა არანაირ კავშირში არ არის თემურ აბაზოვთან. აბაზოვის ბრალდება ჩამოკიდებულია მხოლოდ ერთადერთი დაზარალებულის ჩვენებაზე“, – აცხადებს მოსიაშვილი.
პროკურორ ლევან ლაზარიშვილის განცხადებით კი, დღეს გამოკიტხული მოწმე უშუალოდ შეესწრო დაზარალებულის მიმართ განხორციელებულ ძალადობას.
„წარმოვადგინეთ მოწმე, რომელიც პირდაპირ შეესწრო „ნაციონალური მოძრაობის“ ოფისში დაზარალებულის მიმართ განხორციელებულ ფიზიკურ ძალადობას. მოწმემ დაადასტურა ის გარემოება, რომ ფიზიკური შეურაცხყოფის შემდეგ აღნიშნული პირი მიჰგვარეს თემურ აბაზოვს. დაასახელა სამივე ბრალდებული, კონკრეტული გარემოებები, როგორ და რით მიაყენეს ეს დაზიანებები. გარდა დაზარალებულის ჩვენებისა, ბრალდების მხარეს გვყავს პირდაპირი მოწმეები, ასევე გვაქვს ექსპერტიზის დასკვნები, სხვა სატელეფონო საუბრები. მიგვაჩნია და მოლოდინი გვაქვს, რომ კონკრეტული ბრალდებულების მიმართ უდავოდ დადგება გამამტყუნებელი განაჩენი“, – განაცხადა ლევან ლაზარიშვილმა.
აბაზოვის საქმეს სისხლის სამართლის კოდექსის 144.3-ე მუხლის მე-2 ნაწილის „ა“ ქვეპუნქტით და 25, 157.1 მუხლის პირველი და მეორე ნაწილებით იძიებენ, ხოლო ამავე საქმეზე, ა. ალახვერდიევის, ა.სულეიმანოვის და ე. გულიევის საქმეს საქართველოს სისხლის სამართლის კოდექსის 126-ე მუხლის 1.1-ლი ნაწილის „ბ“ ქვეპუნქტით იძიებენ საქმეს.
