დაკითხვამდე გამოძიებას ჰქონდა არაერთი შეკითხვა ფონდის თანხების ხარჯვის მიზნობრიობასთან დაკავშირებით და სამწუხაროდ, დაკითხვის დასრულების შემდგომაც, ამ კითხვებზე პასუხი ვერ იქნა მიღებული,- ამის შესახებ საქველმოქმედო ფონდ "იავნანას" საქმის პროკურორმა, ამირან გულუაშვილმა ჟურნალისტებთან პაატა ბურჭულაძის მეუღლის, ანგელა ვასილენკოს გამოკითხვის შემდეგ განაცხადა.
პროკურორის განმარტებით, მოწმის სახით გამოსაკითხ პირთან არაერთი კითხვა ჰქონდათ, თუმცა, ვერცერთზე დამაჯერებელი პასუხი ვერ მიიღეს.
"გამოძიებას არაერთი კონკრეტული კითხვა ჰქონდა მოწმესთან მიმართებაში. თუმცა, ყველა ამ კითხვასთან მიმართებაში ვერ მივიღეთ დამაჯერებელი და კონკრეტული პასუხები. მოწმემ ზოგადად გაიხსენა მისი საქმიანობა, ზოგადად ისაუბრა იმ ფუნქციასთან დაკავშირებით, რაც ფონდში გააჩნდა. თუმცა, კონკრეტული მოქმედებები, მის მიერ გაწეული კონკრეტული სამუშაოები "იავნანას"საქმიანობასთან დაკავშირებით, მოწმემ ვერ გაიხსენა", - განაცხადა გულუაშვილმა.
მისთვის გაუგებარია, თუ რატომ უნდა მომხდარიყო ბურჭულაძისა და მისი მეუღლის სასტუმროში ცხოვრების ხარჯების ფონდიდან ანაზღაურება.
"მოწმემ განაცხადა, რომ მათი ოჯახის საკუთრებაში იყო თბილისში კეთილმოწყობილი საცხოვრებელი ბინა, რომელშიც მოხუცი ქალბატონი ცხოვრობდა და რომელთან ერთადაც ცხოვრებაც ვერ იქნებოდა მოსახერხებელი პაატა ბურჭულაძისათვის და მისი მეუღლისათვის მათი საქმიანობიდან გამომდინარე. თბილისში ჩამოსული სტუმრების საუზმე და ვახშამი, რომლებიც "იავნანას" მიერ ორგანიზებულ კონცერტთან იყვნენ დაკავშირებული, ასევე გულისხმობდა პაატა ბურჭულაძის და მისი მეუღლის დასწრებას. აქედან გამომდინარე, მათ მიერ იქნა მიღებული გადაწყვეტილება, რომ უფრო მოხერხებული იქნებოდა მათთვის სასტუმროში ცხოვრება ამ პირებთან ერთად. მიუხედავად ამისა, გაუგებარია, რატომ უნდა მომხდარიყო სასტუმროს ხარჯების ანაზღაურება ფონდის თანხებით", - დასძენს პროკურორი.
გულუაშვილის განმარტებით, ანგელა ვასილენკო ფონდის თანხებით, როგორც ბურჭულაძის თანმხლები პირი, ახორციელებდა ფრენებს.
ანგელა ვასილენკოს მიერ "განხორციელებულია არაერთი რეისი, როგორც საქართველოში ჩამოსასვლელად, ასევე საქართველოდან გასამგზავრებლად, რაც დაფინანსებულია საქველმოქმედო ფონდის მიერ. მან განმარტა, რომ უმეტეს შემთხვევაში, როგორც პაატა ბურჭულაძის თანმხლები პირი, მიემგზავრებოდა, ან ჩამოდიოდა საქართველოში. ამ კუთხითაც, გაუგებარია რატომ უნდა მომხდარიყო პაატა ბურჭულაძის მეუღლის მგზავრობის ხარჯების ანაზღაურება უშუალოდ ფონდის თანხებიდან", - აღნიშნა გულუაშვილმა.
