რას მოვესწარით, სადამდე დეგრადირდა ქართული სახელმწიფო, მისი მთავარი ინსტიტუციის ხელმძღვანელი პარლამენტის თავმჯდომარე, მეორე პირი სახელმწიფოსი საგანგებო ბრიფინგებს უძღვნის ნიკა გვარამიას, მოქალაქის სტატუსებს, - ამის შესახებ "რუსთავი 2"-ის გენერალურმა დირექტორმა ნიკა გვარამიამ პარლამენტის თავმჯდომარის, ირაკლი კობახიძის დღევანდელ ბრიფინგთან დაკავშირებით განაცხადა.
მისი თქმით, მას არ ესმის, როცა ქვეყანაში ამდენი პრობლემაა, რატომ უნდა გამართოს პარლამენტის თავმჯდომარემ მოქალაქის Facebook პოსტთან დაკავშირებით.
"რას მოვესწარით, სადამდე დეგრადირდა ქართული სახელმწიფო, მისი მთავარი ინსტიტუციის ხელმძღვანელი პარლამენტის თავმჯდომარე, მეორე პირი სახელმწიფოსი საგანგებო ბრიფინგებს უძღვნის ნიკა გვარამიას, მოქალაქის სტატუსებს. ამ ქვეყანას მეტი პრობლემა არ აქვს ჩემი სტატუსების გარდა? ამ ქვეყანაში არ იტაცებენ ადამიანებს, ამ ქვეყანაში არ ჩაჰყავთ სარდაფებში ადამიანები, ეს ქვეყანა არ არის ოკუპირებული, ამ ქვეყანაში არ შიმშილობს მოსახლეობის დიდი ნაწილი, ამ ქვეყანაში არ არის უზარმაზარი დაუსაქმებელი ადამიანების მასა? არ მესმის უბრალოდ. მთავარი არის ის, რომ ჯერ შეხედეთ პარლამენტის თავმჯდომარეს, მერე შემომხედეთ მე, მოუსმინეთ მას და მომისმინეთ მე - ვინ არის ფაშისტი ჩვენ ორს შორის, მე მგონი კითხვის ნიშნები არ დაგრჩებათ", - განაცხადა გვარამიამ.
ცნობისთვის, დღეს ირაკლი კობახიძემ ნიკა გვარამიას Facebook პოსტთან დაკავშირებით ბრიფინგი გამართა, სადაც ნიკა გვარამიას უნიათო ფაშისტი უწოდა.
შეგახსენებთ, ტელეკომპანია "რუსთავი 2"-ის გენერალურმა დირექტორმა ნიკა გვარამიამ სოციალურ ქსელში დაწერა, რომ ყველა, ვინც სალომე ზურაბიშვილს ან აფინანსებს, ან კამპანიაში სხვაგვარად ეხმარება, ყველა პოლიტიკოსი, რომელიც დაყვება და მხარს უჭერს, უკიდურესად უნდა შევავიწროვოთ.
