„ნაცმოძრაობის“ მიერ შექმნილი პოლიტიკის კეთების, სახელმწიფოებრივი მმართველობის სტანდარტები - აი ესაა შესაცვლელი და მმართველი გუნდი, „ოცნება“ სავარძლების და ხელისუფლების შესანარჩუნებლად ამ სტანდარტებს ტოვებს უცვლელად და ქართულ ფაშიზმზე და ჰოლოკოსტზე საუბრებით უდიდესი რისკის წინაშე აყენებს ქვეყანას, - ამის შესახებ "შენების მოძრაობის" საპრეზიდენტო კანდიდატმა დავით უსუფაშვილმა განაცხადა.
მისი თქმით, "ეს კი არის საზოგადოებაში შესაძლო დაპირისპირების უმაღლესი ფორმა, რისი დაშვებაც დაუშვებელია".
"ამიტომ, იმედი მაინც მინდა ვიქონიო, რომ ვინმეს შერჩა საღი აზრი “ქართული ოცნების“ წიაღშიი, ვინმეს შერჩა იმის კეთილგონიერება, რომ გაიაზროს, მსგავსი სახის შეჯიბრში, სადაც ცდილობ ნებისმიერი გზით და ნებისმიერი საშუალებით დაამტკიცო, რომ შენი მოწინააღმდეგე შენზე უარესია და, შესაბამისად, პოლიტიკური სივრციდან ცდილობ წაშალო ყველა და ყველაფერი, ჩემი და სხვა კანდიდატების ჩათვლით, ეს კარგს არაფერს მოიტანს ამ ქვეყანაში.
არჩევნების დღის მოახლოების კვალობაზე, „ოცნება“ და „ნაცმოძრაობა“ უფრო და უფრო ებმებიან ერთმანეთთან ბრძოლაში წესების გარეშე, რაც ხდება ქვეყნის და საზოგადოების ხარჯზე. ბოლო ხანებში მათ მიერ გაგრძელდა ერთმანეთის უარესობის მტკიცება და ამ პროცესში უკვე გადაკვეთილია პრაქტიკულად წითელი ზღვარი. საჭიროა შეჩერება!
დიახ, „ნაცმოძრაობის“ მხრიდან მუქარის ტონი „ოცნების“ მხარდამჭერებზე იყო დაუშვებელი და ეს არის უგუნურება, რომელიც უნდა შეწყვიტოს „ნაცმოძრაობამ“. მაგრამ, „ოცნების“ მხრიდან იმ ტერმინების შემოტანა პოლიტიკურ და საარჩევნო პროცესში, როგორიცაა ფაშიზმი, როგორიცაა ჰოლოკოსტი, ეს არის არა მხოლოდ ქართული პოლიტიკისთვის მიუღებელი წითელი ხაზები, არამედ, ზოგადად, საკაცობრიო სტანდარტის უხეში დარღვევა.
მრჩება შთაბეჭდილება, რომ ადამიანებს, ვინც ფაშიზმზე და ჰოლოკოსტზე საუბრობენ, წარმოდგენაც კი არ აქვთ, თუ რაზე საუბრობენ და რა ხიფათს უქმნიან ქვეყანას; რა პრობლემებს იწვევს ეს საზოგადოებაში და რაოდენ იზრდება მასშტაბური სამოქალაქო დაპირისპირების საფრთხე.
ანუ, ხელისუფლება, ერთის მხრივ, ამბობს, რომ „ნაცმოძრაობის“ მხარდამჭერთა რაოდენობა 27 %-მდეა და, მეორეს მხრივ, საკუთარი მოსახლეობის თითქმის მესამედს ფაშიზმში და ჰოლოკოსტში ადანაშაულებს. ეს არის ყოვლად წარმოუდგენელი და ქართულ პოლიტიკაში 30 წლის განმავლობაში მსგავსი არაფერი მომხდარა.
მე მინდა მივმართო, თუ ვინმეს შერჩა კეთილგონიერება „ოცნების“ მმართველ გუნდში, დროზე შეჩერდეს!
ან ბოდიში მოიხადოს ამ ყველაფრისთვის და შეაჩეროს ის ესკალაცია, რაც მგავს ტერმინებს და მსგავს შეფასებებს მოჰყვება, ან თუ მე და ჩვენ ვცდებით, მაშინ კეთილი ინებოს, მიმართოს პრეზიდენტს, გამოაცხადოს საგანგებო მდგომარეობა, გადადოს საპრეზიდენტო არჩევნები და მართლმსაჯულების წინაშე დააყენოს ყველა, ვინც დამნაშავეა ფაშიზმში, ჰოლოკოსტში და კაცობრიობის წინააღმდეგ დანაშაულში.
ვინ ებრძვის ფაშიზმს და ჰოლოკოსტს არჩევნებში?!
ვის უზის ფაშისტები პარლამენტში და მათთან ერთად ქვეყნის მართვას აგრძელებს?!
და თუ ეს ასეა, მაშინ ამ გზას უნდა დაადგეს ხელისუფლება და აიღოს პასუხისმგებლობა თავის ნათქვამზე და სიტყვებზე. ასე გაგრძელება დაუშვებელია; მითუმეტეს, იმ პირობებში, როდესაც საარჩევნო პროცესში „ოცნება“ აგრძელებს „ნაცმოძრაობის“ „ დიდ ტრადიციებს“ პოლიტიკური ოპონენტების უფლებების შელახვის ნაწილში.
დღეს დმანისიდან გვაცნობეს, რომ სამი დღის წინ გაფორმებული ხელშეკრულება ოფისის ქირავნობის თაობაზე მეპატრონემ უკან გაიტანა იმიტომ, რომ მას დაურეკეს და აიძულეს უარი ეთქვა თავისი კუთვნილი ფართი ჩვენთვის დაეთმო. და ეს ყველაფერი აიძულა წინა ხელისუფლების და ამ ხელისუფლების, მახინჯი სისტემის სიმბოლომ - ბატონმა კახა ოქრიაშვილმა, რომელიც „ოცნებამ“ დატოვა. არადა, ყველას კარგად გვახსოვს, 2012 წელს როგორ შეიჭრა „ოცნების“ ოფისში მაშინდელი „ნაცმოძრაობის“ მაჟორიტარი დეპუტატის, კახა ოქრიაშვილის ბიუროს უფროსი და მისი ნათესავი, მერაბ ოქრიაშვილი და საკუთარი პიკაპით რამდენჯერმე დაეჯახა ოპოზიციის კუთვნილ ავტომანქანას და ეს არ იყო პირველი დანაშაული მათი მხრიდან. დღეს ეს ადამიანი „ოცნების“ საკრებულოს თავმჯდომარეა, რომელიც ატერორებს ადგილობრივ მოსახლეობას, რომ ოპოზიციას არ დაუთმონ საკუთარი ფართი.
აი, ეს პრობლემებია დღეს მოსაგვარებელი!
ამიტომ, მე ისევ საზოგადოებას მინდა მივმართო, რომ ამ არჩევნებზე გავაკეთოთ სწორი არჩევანი!
არჩევანი წინ!
ჩვენ მეტი შეგვიძლია!
ჩვენ შეგვიძლია უკან მოვიტოვოთ „ნაცმოძრაობული“ წარსულიც და „ქართულოცნებური“ დღევანდელი რეალობაც და თან ისე, რომ არ დავაზარალოთ ჩვენი ქვეყანა; რომ ამ ქვეყანაში ყველა კანონმორჩილი ადამიანის ადგილი იყოს და აღარასოდეს გვქონდეს ლაპარაკი ამ ყველაფერზე", - განაცხადა უსუფაშვილმა.
