კრიტიკულ ვითარებაში არიან, რადგან ისეთი საპრეზიდენტო კანდიდატი ჰყავთ, რომელიც არჩევნებს აგებს, - ამის შესახებ "ევროპული საქართველოს" ერთ-ერთმა ლიდერმა გიგა ბოკერიამ პარლამენტის თავმჯდომარის ირაკლი კობახიძის დღევანდელ ბრიფინგთან დაკავშირებით განაცხადა.
გიგა ბოკერია ირაკლი კობახიძის მიერ ფაშიზმზე გაკეთებულ განცხადებას იმ ადამიანების ხსოვნის შეურაცხყოფად აფასებს, ვინც ფაშიზმს შეეწირა.
„ეს ყველაფერი ორ დიდ პრობლემაზე მიგვითითებს. ეს არის დიდი შეურაცხყოფა იმ ადამიანების ხსოვნის, ვინც ფაშიზმს, ამ დიდ უბედურებას შეეწირა. მანამდე კობახიძემ რიტორიკულად ჰოლოკოსტი დაგვაბრალა, რაც დიდი შეურაცხყოფაა კაცობრიობის ისტორიაში ყველაზე დიდი ტრაგედიის. მას არ ესმის, რომ ამით ტკივილს ჩვენ კი არ გვაყენებს, ამ ადამიანების ხსოვნას ამაიმუნებს და აბაიბურებს. სიტყვის თავისუფლების ფარგლებშიც კი ასეთი ეპითეტების გამოყენება მიუღებელია.
კრიტიკულ ვითარებაში არიან, რადგან ისეთი საპრეზიდენტო კანდიდატი ჰყავთ, რომელიც არჩევნებს აგებს. ამიტომ, სახეს და საქციელს კარგავენ და ყველანაირი სტანდარტიდან ამომხტარები არიან, რაც იმაზე მიუთითებს, რომ ქვეყნის მართვისთვის მზად არ არიან”, – განაცხადა ბოკერიამ.
ცნობისთვის, ირაკლი კობახიძემ დღევანდელ ბრიფინგზე ნიკა გვარამიამ Facebook პოსტთან დაკავშირებით ისაუბრა და თქვა, რომ გვარამია ფაშისტია.
