ფონდის თანხებიდან დოკუმენტაციების შესწავლა ცხადყოფს, რომ დაახლოებით, 700 000 ლარი არის დახარჯული პაატა ბურჭულაძის და მისი მეუღლის მგზავრობის ხარჯებისთვის, ისე რომ არ მოიპოვება არცერთი დოკუმენტი იმის თაობაზე, თუ რამდენად წარმოადგენდა ამ ხარჯების ანაზღაურება ფონდის მიზანს, - ამის შესახებ ჟურნალისტებთან პროკურორმა ამირან გულუაშვილმა განაცხადა.
როგორც ის აღნიშნავს, ფონდ "იავნანას" ყოფილი პრეზიდენტის, პაატა ბურჭულაძის მეუღლის, ადვოკატის სოსო ბარათაშვილის განმარტებები იმასთან დაკავშირებით, რომ გამოძიება ვასილენკოს საქართველოდან გამგზავრებასთან დაკავშირებით, ინფორმირებული იყო, სიმართლეს არ შეესაბამება.
"რაც შეეხება, მოწმის სახით გამოსაკითხი პირის ადვოკატის განმარტებას იმასთან დაკავშირებით, რომ გამოძიება 4 ოქტომბერს წინასწარ იყო ინფორმირებული იმასთან დაკავშირებით, რომ ანგელა ვასილენკო საქართველოს ტერიტორიის დატოვებას აპირებდა, ეს არ შეესაბამება სინამდვილეს. დაცვას ამასთან დაკავშირებით, არანაირი დოკუმენტი წარმოუდგენია. თუ რაიმე დოკუმენტი ამის შესახებ არსებობდა, თავისუფლად შეეძლოთ წარმოედგინათ პროკურატურაში", - აცხადებს გულუშავილი და დასძენს, რომ საგამოძიებო უწყება ვასილენკოსგან კონკრეტულ პასუხებს ელოდება.
"2014-2015 წლებში ანგელა ვასილენკო დასაქმებული იყო საზოგადოებრივ საწყისებზე, ხოლო 2015 წელს მოხდა მისი კონკრეტულ თანამდებობაზე დანიშვნა. ფონდში მის საქმიანობასთან დაკავშირებით, გვექნება გამოძიებას კონკრეტული შეკითხვები და ველოდებით, გამოსაკითხი პირისგან კონკრეტულ პასუხებს", - აცხადებს გულუაშვილი.
