ბარნოვზე, 25 წლის თაკო გამრეკელაშვილის მკვლელობის საქმეზე ბრალდებული მამინაცვლის, ვეფხია ბაქრაძის ადვოკატი, თამაზ მაგლაქველიძე აცხადებს, რომ მისი დაცვის ქვეშ მყოფს, რომელსაც სახელმწიფო ბრალდება მოკლული გამრეკელაშვილისთვის 33 ჭრილობის მიყენებას ედავება, განსაკუთრებული სისასტიკით არ ჩაუდენია.
"დღეს გამოკითხული მოწმეები გარდაცვლილის დედის, ნათია გობაძის თანამშრომლები იყვნენ. აღნიშნულმა მოწმეებმა აღწერეს, რომ ბრალდებულსა და გობაძეს კარგი ურთიერთობა ჰქონდათ.
საქმის მასალებით და მოწმეთა ჩვენებებით დადასტურდება, რომ ეს სისასტიკით ჩადენილი დანაშაული არ არის.
ვეფხია ბაქრაძე გამრეკელაშვილს მოგერიების მიზნით ართმევდა დანას და შემდეგ აღარაფერი ახსოვს. ეს ექსპერტიზის დასკვნით, მისი ჩვენებით დადასტურდება. ამ საქმის ირგვლივ ბევრი მოწმეა და ვიმედოვნებ, ყველაფერს ნათელი მოეფინება", - განაცხადა მან.
ცნობისთვის, თაკო გამრეკელაშვილი მიმდინარე წლის 13 აპრილს, თბილისში, ბარნოვის ქუჩაზე მოკლეს. მას ყელი ჰქონდა გამოჭრილი. აღნიშნულ დანაშაულზე სამართალდამცავებმა მოკლულის მამინაცვალი, ვეფხია ბაქრაძე 14 აპრილს, თელეთში დააკავეს. ის მიმალვაში იმყოფებოდა.
გამოძიება 11 პრიმა 109-ე მუხლით მიმდინარეობს, რაც ოჯახში ძალადობის ნიადაგზე ჩადენილ განზრახ მკვლელობას დამამძიმებელ გარემოებაში გულისხმობს. აღნიშნული მუხლი 16-დან 20 წლამდე ან უვადო პატიმრობას ითვალისწინებს.
სამართალდამცველებმა ბარნოვის ქუჩაზე მომხდარი მკვლელობის საქმეზე კიდევ ერთი პირი, ბრალდებულ ვეფხია ბაქრაძის ბიძაშვილი, თემურ ბაქრაძე დააკავეს. მას ბრალი დანაშაულის შეუტყობინებლობისთვის აქვს წაყენებული. ჩადენილი დანაშაული 2-დან 4 წლამდე თავისუფლების აღკვეთას ითვალისწინებს.
