ვანო მერაბიშვილს გაფართოებული აქვს მარჯვენა თვალის გუგა, თვალის კაკალი არის დაპატარავებული და უკან არის გადაწეული, პრაქტიკულად, სახის დამბლაა გამოწვეული ამ დაავადების გამო, - ამის შესახებ მერაბიშვილის ადვოკატმა, გიორგი ჩივიაშვილმა პრესკონფერენციაზე განაცხადა.
მერაბიშვილის ადვოკატები და ოჯახის წევრები მოითხოვენ, მის მკურნალობაში უცხოელი ექიმები ჩაერთონ.
„ქალბატონმა თეა წულუკიანმა გააკეთა განცხადება, რომ ვანო მერაბიშვილის ჯანმრთელობასთან დაკავშირებით არანაირი პრობლემა არ არსებობს. ამ განცხადებიდან ზუსტად 8 საათში ვანო მერაბიშვილი გადაიყვანეს სამოქალაქო კლინიკაში „მედიქლაბში“. სრული პასუხისმგებლობით ვაცხადებ, რომ დღემდე ვანო მერაბიშვილის დიაგნოზი დადგენილი არ არის. ჩვენ ვიცით მხოლოდ ერთი რამ, რომ ეს ადამიანი 5 ჯერ იქნა კლინიკაში გადაყვანილი, ვიცით, რომ მას აქვს ჰორნერის სინდრომი, მაგრამ რითია გამოწვეული ეს სინდრომი, დღემდე არ გვეუბნებიან. ჩვენ გვაქვს ძალიან ბევრი კითხვის ნიშანი ამასთან დაკავშირებით.
უკვე ორ თვეზე მეტია გვეუბნებიან, რომ არის ჰორნერის სინდრომი, გვეუბნებიან, რომ ამ სინდრომის უკან შეიძლება იდგეს უმძიმესი დაავადებები, როგორიც არის სიმსივნე, ინტოკსიკაცია, ინსულტი და ამავდროულად გვეუბნებიან, რომ არ აქვთ დადგენილი რამ გამოიწვია ეს ჰორნერის სინდრომი.
აღნიშნულთან დაკავშირებით მივმართეთ ასევე სახალხო დამცველის აპარატსაც და ვთხოვეთ, რომ იყოს მკაცრი მონიტორინგი მერაბიშვილის მკურნალობასთან დაკავშირებით,“ - განაცხადა გიორგი ჩივიაშვილმა.
