ხორავას ქუჩის საქმეზე ერთ-ერთი მსჯავრდებულის, გ.ბ.-ს ადვოკატი, ლანა ცერცვაძე აცხადებს, რომ ბრალდების მხარის მიერ წარმოდგენილი შუამდგომლობები არ უნდა იქნეს დაკმაყოფილებული.
"დღევანდელ სასამართლო სხდომაზე ბრალდების მხარემ უკვე დაკითხული მოწმეების განმეორებით დაკითხვასთან დაკავშირებით დააყენა შუამდგომლობა. გარდა ამისა, დაყენდა ახალი მოწმის დაკითხვის შუამდგომლობა, რომელიც აქამდე არ ყოფილა დაკითხული.
სანახავია რიგი მტკიცებულებები, თუ რა ობიექტური მიზეზი ჰქონდა ბრალდების მხარეს იმისთვის, რომ აქამდე ვერ მოხდა დასახელებული მტკიცებულებების პირველი ინსტანციის სასამართლოში გამოკვლევა.
ესენი არიან მოწმეები, რომლებიც უკვე მრავალჯერ არიან დაკითხული, როგორც გამოძიებაში, ასევე თბილისის საქალაქო სასამართლოში. თუკი, ის გარემოებები არსებობდა, რაზეც დღევანდელ პროცესზე ბრალდების მხარე საუბრობდა, მათ ჰქონდათ შესაძლებლობა სასამართლოში ესაუბრათ. ეს ახლადგამოვლენილ გარემოებად არ უნდა იქნეს მიჩნეული.
დიდი ალბათობით, ეს ყველაფერი ემსახურება მ.კ.-ს მოწმის სტატუსის აღდგენას, რომლის ჩვენებაც თბილისის საქალაქო სასამართლოში არ იქნა გაზიარებული", - განაცხადა ცერცვაძემ.
