განცხადება, რომელიც დღეს პარტია “ქართულ ოცნებაში“ გაკეთდა, არის ბიძინა ივანიშვილის პოლიტიკურად უტიფარი გუნდის მორიგი, მაგრამ დიდი მასშტაბის უტიფარი განცხადება, - ამის შესახებ ჟურნალისტებს "ევროპული საქართველოს" ერთ-ერთმა ლიდერმა გიგა ბოკერიამ განუცხადა.
მისი თქმით, ახლა ხელისუფლების დაცვის ხაზია, რომ ვიღაცა თუ რაღაცაზე საუბრობს, თავად არაფერს შუაში არ არიან.
"გაიშიფრა სისტემური ვერტიკალური კორუფციის სქემა - დაწყებული ივანიშვილით, პრემიერ-მინისტრისა და მინისტრების ჩართვით. ეს სქემა დასტურდება არა მხოლოდ ერთი ბიზნესმენის განცხადებით, რომელიც გადააგდეს, არა მხოლოდ ჩანაწერებით, სადაც ამ სქემაზე ყოფილი თანამდებობის პირები და ხელისუფლებასთან დაახლოებული ბიზნესმენები საუბრობენ, არამედ რეალურ ცხოვრებაში მომხდარი ამბებით - “ფილიპ მორისთან“ დაკავშირებული სასამართლო პროცესი ადასტურებს, რომ რაზეც ჩანაწერებში საუბრობენ, შემდეგ ის ცხოვრებაში ხდება. მაშინ, როცა ხორავას ქუჩაზე მომხდარი ტრაგედიის შემდეგ, შესაძლო მკვლელსა და ეჭვმიტანილს ხელი დააფარეს, რადგან ის თანამდებობის პირის ახლობელი იყო, ეს ხალხი ბედავს და უტიფრად კიდევ ტალახს ისვრის ოპონენტების წინააღმდეგ. უტიფარ სიცრუეს ამბობენ, რომ თითქოს პარლამენტის საგამოძიებო კომისიამ საქმეში პოლიტიკური მოტივი ვერ დაადგინა. სწორედ კომისიამ დაადგინა, რომ თანამდებობის პირის ახლობლობის გამო დააფარეს ხელი სავარაუდო ეჭვმიტანილს. ამ ხალხმა გაბედა და საპრეზიდენტო კანდიდატად დაასახელა პირი, რომელიც პირდაპირ ქვეყნის ეროვნული ინტერესების წინააღმდეგ მუშაობს - ამ ყველაფერს პასუხი 28 ოქტომბერს უნდა გაეცეს. დარწმუნებული ვარ, ეს პასუხი იქნება მკაფიო და ამ პასუხით დაიწყება ივანიშვილის გუნდის გაძევება პოლიტიკური მმართველობიდან“, - განაცხადა გიგა ბოკერიამ.
