სმიტების ოჯახის მკვლელობაში ბრალდებული 19 წლის მწყემსის, მალხაზ კობაურის შემთხვევის ადგილზე ჩაყვანასა და საგამოძიებო ექსპერიმენტში მონაწილეობაზე შინაგან საქმეთა სამინისტრომ უარი განაცხადა. აღნიშნული ინფორმაცია „ჯი-ეიჩ-ენს“ კობაურის ადვოკატმა, ვასილ მამულაშვილმა მიაწოდა.
„საგამოძიებო ექსპერიმენტზე უარი გვითხრეს. ოფიციალური განმარტება ჯერ არ მიგვიღია. თუ რაზე დააფუძნებენ ისინი განმარტებას, ჩემთვის უცნობია. მათი თქმით, თითქოს, კობაურმა თავდაპირველად აღიარებითი ჩვენება მისცა, არადა სინამდვილეში ჩვენება მას არ მიუცია, გამომძიებელმა შეადგინა თავისი ვერსიით. ამის შემდეგ საგამოძიებო ექსპერიმენტი ჩატარდა. უკვე ახალი ჩვენების პირობებში საგამოძიებო ექსპერიმენტის ჩატარება მანამდე ჩატარებულ საგამოძიებო ექსპერიმენტს მტკიცებულებით სახეს უკარგავს, ანუ ეს ახალი საგამოძიებო ექსპერიმენტი ჩაანაცვლებს“, - აცხადებს მამულაშვილი.
შს სამინისტროს უარი ადვოკატებს სავარაუდოდო, დღეს ჩაბარდებათ, რასაც უფლებადამცველები სასამართლოში დღესვე გაასაჩივრებენ.
ადვოკატები აპირებენ, სწორედ სასამართლოს ძალით ჩაიყვანონ და ადგილზე გამოკითხონ ბრალდებული კობაური.
„დღეს ვაპირებთ სასამართლოს მივმართოთ და სასმართლოს წესით მოვითხოვთ განჩინების გამოტანას.
გამოძიების ფუნქცია ჭეშმარიტებისკენ უნდა იყოს მიმართული. მათი მხრიდან ხელის შეშლა, დაუხმარებლობა სწორი არ არის.
შინაგან საქმეთა სამინისტრო ექსპერიმენტში მონაწილეობის მიღებასა და დასწრებაზეც უარს აცხადებს“, - აღნიშნავს მამულაშვილი.
