სასამართლომ ყოველგვარი განმარტების და დასაბუთების გარეშე გამოაცხადა თავისი გადაწყვეტილების სარეზოლუციო ნაწილი. მან უპირობოდ დააკმაყოფილა პროკურატურის მოთხოვნა კი არა, ამას უფრო ბრძანებას დავარქმევდი და აღკვეთი ღონისძიების სახით, ექვსივე დაკავებულს პატიმრობა შეუფარდა, - განაცხადა ჟურნალისტებთან სააფთიაქო ნარკომანიის საქმეზე დაკავებული ნათელა მამულაშვილის ადვოკატმა, ნათია სირაძემ.
მისი განმარტებით, მამულაშვილის პატიმრობაში დატოვების საფუძველი არ არსებობდა.
"მიუხედავად იმისა, რომ აღკვეთის ღონისძიების, პატიმრობის გამოყენების არც მიზანი, არც საფუძველი და არც დასაბუთებული შუამდგომლობა პროკურატურას არ წარმოუდგენია, ისინი მაინც პატიმრობაში დატოვეს.
63 წლის ქალბატონს აღკვეთის ღონისძიება, როგორიც პატიმრობაა, შეუფარდეს მაშინ როცა ამის არანაირი საფუძველი არსებობს, არც ვარაუდი რომ დაიმალება, პირიქით, ექვსივე ბრალდებული თანამშრომლობდა გამოძიებასთან, კეთილსინდისიერად ცხადდებოდნენ, ჩვენებებს აძლევდნენ და მათი მხრიდან არანაირ დარღვევას ადგილი არ ჰქონია", - აცხადება სირაძე.
ის სასამართლოს დღევანდელ გადაწყვეტილებას გაასაჩივრებს.
ცნობისთვის, სააფთიაქო ნარკომანიის საქმეზე დაკავებულ 6 პირს, მათ შორის, ჯანდაცვის სამინისტროს სსიპ სამედიცინო საქმიანობის სახელმწიფო რეგულირების სააგენტოს უფროსს გია თვალავაძეს აღკვეთის ღონისძიების სახით პატიმრობა შეეფარდა.
სუს-მა ე.წ. სააფთიაქო ნარკომანიის სფეროში ფსიქოტროპული საშუალებების უკანონო ბრუნვის საქმეზე სამსახურებრივი უფლებამოსილების ბოროტად გამოყენების ფაქტზე ჯანდაცვის სამინისტროს სსიპ სამედიცინო საქმიანობის სახელმწიფო რეგულირების სააგენტოს უფროსი გია თვალავაძე დააკავა. ასევე, ბრალდებულის სახით დაკავებულები არიან უკანონო სამეწარმეო საქმიანობაში ჩართული კიდევ 5 პირი.
