ბერლინის 61-ე საერთაშორისო კინოფესტივალს ჟიურის თავმჯდომარე იტალიელი მსახიობი იზაბელა როსელინი იქნება. ბერლინის მორიგი საერთაშორისო კინოფესტივალი 2011 წლის 10-20 თებერვალს ჩატარდება.
"იზაბელა როსელინი მრავალმხრივ ნიჭიერი მხატვარია, რომელსაც ევროპელ და ამერიკელ კინემატოგრაფისტებთან მუშაობის დიდი გამოცდილება აქვს", _ განაცხადა კინოფესტივალის დირექტორმა დიტერ კოსლიკმა.
შვედი მსახიობის ინგრიდ ბერგმანისა და იტალიელი რეჟისორის რობერტო როსელინის ქალიშვილი, იზაბელა როსელინი, 1952 წელს დაიბადა. მისი კინოდებიუტი ვინსენტ მინელის ფილში "ეს დროის საკითხია" (1976) (A Matter of Time) შედგა.
საყოველთაო აღიარება მას მოუტანა დევიდ ლინჩის ფილმმა "ლურჯი ხავერდი".
2008 წელს იზაბელა როსელინი ბერლინის კინოფესტივალზე წარმოდგენილი იყო ფილმით "მწვანე პორნო" (Green Porno), სადაც ის ერთდროულად რეჟისორი, პროდიუსერი და ყველა მთავრი როლის შემსრულებელი იყო.
