თქვენ არაერთგზის დაარღვიეთ უდანაშაულობის პრეზუმფცია, მაღალი ტრიბუნიდან გაიძახოდით, რომ თურმე მ.კ. ყოფილა მკვლელი, თუმცა ვერ წარმოადგინეთ ვერც ერთი მტკიცებულება მკვლელობაში მისი დადანაშაულების დადასტურებული გარემოებების შესახებ, – ასე მიმართა პარლამენტის ტრიბუნიდან საპარლამენტო უმრავლესობის წევრმა ანრი ოხანაშვილმა „ევროპული საქართველოს“ წევრებს.
ოხანაშვილმა „ევროპული საქართველოს“ წევრებს უთხრა, რომ მათ ფეხქვეშ გათელეს არასრულწლოვანთა მართლმსაჯულების კოდექსი.
„არც ერთხელ თქვენს გამოსვლაში არ გიხსენებიათ, რომ გ.ჯ. არის პირი, რომელიც დავით სარალიძის მკვლელობის მცდელობისთვის არის პასუხისგებაში მიცემული. მას 13 წლით თავისუფლების აღკვეთა ჰქონდა მისჯილი და იმ არასრულწლოვანთა მართლმსაჯულების კოდექსიდან გამომდინარე, რომელიც მივიღეთ, ერთი მეოთხედით შეუმცირდა სანქცია და დღეს ეს პირი დავით სარალიძის მკვლელობის მცდელობისთვის ცხრა წლითა და ცხრა თვით იხდის სასჯელს საპატიმროში“, – მიმართა ანრი ოხნაშვილმა.
მისივე თქმით, „ევროპულმა საქართველომ“ ხორავას ქუჩაზე მკვლელობის საქმეზე დასკვნაში არ ჩაწერა, რომ მთავარი პროკურორი გადადგა, რადგან ეს ფაქტი უმნიშვნელოდ მიიჩნიეს.
„ეს ქრონოლოგია არც აღწერეს, იმდენად უმნიშვნელოდ მიიჩნიეს, რომ მთავარმა პროკურორმა აიღო მაღალი მორალური პასუხისმგებლობა და გადადგა, თუმცა მათ შემოგვთავაზეს მერაბიშვილის ქეისი. ეჭვების დონეზე საუბრობენ, რომ თურმე არსებობს ეჭვი, რომ შოთაძე რაიმე სახით უკავშირდება მერაბიშვილის საქმეს და სისხლის სამართლებრივი დევნის დაწყებას ითხოვენ უაპელაციოდ, მტკიცებულებათა ერთობლიობის გარეშე. შესაბამისად, როგორი პოლიტიკური ელფერი აქვს ამ დოკუმენტს ხედავთ, ეს არის ის დამღა, რომელიც ამ დოკუმენტს დაასვით და, რომელიც გაგყვებათ ამ საგამოძიებო კომიისის ფარგლებში.
გახარიას პასუხიმგებლობის დაყენებას ითხოვენ, რადგან გახარიამ განაცხადა, რომ ამ ეტაპზე არ მიმდინარეობს საგამოძიებო მოქმედებები, როდესაც იმ თვეში 500 საგამოძიებო მოქმედება ჩატარდა.
წულუკიანთან პირად პაექრობას გადააყოლეს ეს დოკუმენტი და ასეთი ვიწრო პარტიული ინტერესებით იხელმძღვანელეს.
მათ დასკვნაში ჩაწერეს, რომ თურმე ჩვენ კვოტები ვერ ავითვისეთ, მაშინ როცა გამოვიჩინეთ მაღალი პოლიტიკური პასუხისმგებლობა და მათ გადავეცით მართვა, ამას საუბრობს ის ხალხი, ვინც 2007 წელს არ დაუჭირა მხარი სანდრო გირგვლიანის საქმეზე საგამოძიებო კომისიის შექმნას, არათუ ვინმეს გადასცეს კომისია, არამედ არ დაუჭირეს მხარი მთელი რიგი საგამოძიებო კომისიების შექმნას“, – აღნიშნა ანრი ოხანაშვილმა.
