ხელისუფლების მხრიდან სისხლიანი გარჩევებისა და ვენდეტას პირდაპირი წახალისებაა, თუკი საზოგადოება დაინახავს, რომ ვიღაც იმის გამო არ ისჯება, რომ პროკურატურაში გავლენიანი ახლობელი ჰყავს, - ამის შესახებ "ევროპული საქართველოს" ერთ-ერთმა ლიდერმა გიგა ბოკერიამ პარლამენტის პლენარულ სხდომაზე განაცხადა.
მან "ქართული ოცნების" დეპუტატებს მიმართა:
"თქვენი ვერსიით, იმ შავბნელ წარსულში მართლაც ისე რომ ყოფილიყო, რომ ყველა დაეჭირათ, მათ შორის მუსიკის მასწავლებელი, აქედან თქვენ რა დასკვნა გამოიტანეთ?! თქვენი ვერსიით იმ ცუდი წარსულიდან გამოსავალი არის უკან იმ დროში დაბრუნება, როცა თუ ახალგაზრდებს შორის ასეთი სისხლიანი გარჩევა მოხდება, ვისაც ახლობელი ჰყავს თანადებობის პირი, მას ხელი უნდა დააფარონ და არ უნდა დაისაჯონ?! ეს არის თქვენი დასკვნა?! თქვენი შეფასებით, ცუდი წარსულით ამართლებთ იმას, რომ თუკი სისხლიანი გარჩევა მოხდება, ვისაც ახლობელი ჰყავს პროკურატურაში იმას უნდა დაეფაროს ხელი და სხვები წავიდნენ ციხეში?! ეს არის თქვენი წინგადადგმული ნაბიჯი? ერთი წამი მაინც ხომ შეიძლება, რომ ეს პოლიტიკური კონკურენცია თუ სიძულვილი გვერდით გადადოთ“, - თქვა ბოკერიამ.
მისი თქმით, საგამოძიებო კომისიის მიერ დადგინდა ახალი ფაქტები. მისი განმარტებით, კერძოდ დადგინდა, რომ გამოძიების ყველა ეტაპზე არსებობდა საკმარისი მტკიცებულებები მ.კ.-სთვის ბრალის წარსადგენად, მკვლელობაში თანამონაწილეობაზე. მისი განცხადებით, სწორედ კომისიამ დაადგინა, როგორ გააფუჭეს ეს საქმე და როგორ გააყალბეს მტკიცებულებები. მისივე თქმით, დაადგინა კონკრეტული პირები, ვინ მიმართაც გამოძიება უნდა დაიწყოს - ეს პირები არიან ირაკლი შოთაძე, ზვიად ფხაკაძე, ირაკლი ფიფია.
