საკანონმდებლო ორგანოს თბილისში დაბრუნება საქართველოს ურბანულ განვითარებას ხელს არ შეუწყობს, - ამის შესახებ "ევროპული საქართველოს" წევრმა ხათუნა გოგორიშვილმა განაცხადა.
მისი თქმით, "ქართული ოცნების" პოლიტიკური გადაწყვეტილებაა, რომ ქუთაისი საპარლამენტო დედაქალაქი აღარ იყოს.
მისივე თქმით, არგუმენტი, რომ ქუთაისში პარლამენტის არსებობას კომიტეტები ეწინააღმდეგებიან, სრულიად მიუღებელია. ბევრი შემთხვევა გვახსოვს, როცა კომიტეტებს სხვადასხვა საკითხზე უარყოფითი დასკვნა ჰქონდათ.
„გადაწყვეტილებას მხოლოდ შენობის ბედს ნუ დაუკავშირებთ, რადგან ქუთაისიდან პარლამენტის გადატანა მხოლოდ ის თემა არ არის, ამ შენობაში რა განთავსდება. ეს იმას ნიშნავს, რომ გარდა იმისა, რომ ქუთაისს საპარლამენტო დედაქალაქის სტატუსი აღარ ექნება, ქუთაისში პარლამენტის ასეულობით თანამშრომელი და დეპუტატები აღარ ჩამოვლენ, რაც არის დამატებითი სამუშაო ადგილების მოკლება ქუთაისელებისთვის. ეს საქართველოს ურბანულ განვითარებას ხელს არ შეუწყობს.
პრემიერ კვირიკაშვილის დაპირება კარგად გვახსოვს, რომ სანამ კონკრეტული პროექტი არ განხორციელდებოდა, მანამდე პარლამენტის გადატანის საკითხიც არ დაიძვრებოდა, მაგრამ როგორც კვირიკაშვილი ჩაბარდა პოლიტიკურ ისტორიას, მისი დანაპირებიც ასე ჩაბარდა”, – განაცხადა გოგორიშვილმა.
ცნობისთვის, პარლამენტი თბილისში სრულად დაბრუნდება.
