პირველ დეკემბერს, ხორავას ქუჩაზე მომხდარი მკვლელობის საქმეზე ცრუ ჩვენების მიცემის ბრალდებით დაკავებული მოზარდის, დ.ღ.-ს მამა, კახა ღლონტი აცხადებს, რომ მისი არასრულწლოვანი შვილი პროკურატურის მძევალია. მისივე განმარტებით, სახელმწიფო ბრალდება ვერ ასაბუთებს, თუ რის გამოა დ.ღ. დაკავებული.
"ეს არის ქვეყანა, სახელმწიფო, სადაც პროკურატურას ჰყავს მძევალი, არასრულწლოვანი. თვითონ ვერ გამოიძიეს ეს საქმე, შეცდომები დაუშვეს, თუ რა მოხდა არ ვიცი, მაგრამ დღეს, ამ სასამართლო სხდომაზე მითუმეტეს, გამოვლინდა, რომ ჩემი შვილი პროკურატურის მძევალია. ორი თვეა, ჩემი შვილი დაკავებულია და რამე გააკეთეს? ვინმე არის კიდევ დაჭერილი? რას აკეთებენ საერთოდ? დაიჭირეს ეს არასრულწლოვანი, ორი თვეა პატიმრობაში ჰყავთ და თან, ვერ ასაბუთებენ რატომ ჰყავთ პატიმრობაში და უარს გვეუბნებიან ყველაფერზე საერთოდ. გავაგრძელებთ სამართლებრივ ბრძოლას სიმართლისთვის", - აცხადებს კახა ღლონტი.
