თაკო, ხომ არ შეუვარდა ვეფხიას სახლში? თუ თაკო შეუვარდებოდა ბაქრაძეს სახლში, მაშინ შეიძლებოდა მისგან თავი დაეცვა. თუ ბაქრაძე შეიჭრა თაკოს სახლში, ლოგიკურია, ის დაესხა თავს, - ასე გამოეხმაურა "ჯი-ეიჩ-ენთან" ბარნოვზე 25 წლის თაკო გამრეკელაშვილის მკვლელობაში ბრალდებული მამინაცვლის, ვეფხია ბაქრაძის ადვოკატის, თეიმურაზ მაგრაქველიძის განცხადებას, მოკლული გოგონას მამა, ზვიად გამრეკელაშვილი.
რამდენიმე დღის წინ, პროცესის დასრულების შემდეგ, მაგრაქველიძემ ჟურნალისტებთან განაცხადა, რომ მძიმე დანაშაულში ბრალდებული მისი დაცვის ქვეშ მყოფი ბაქრაძე მოკლული გოგონასგან თავს იცავდა და რომ ის აუცილებელი მოგერიებით მოქმედებდა. ადვოკატის თქმითვე, დანა გამრეკელაშვილს ეკავა, რაც საქმის მასალებით და ბრალდებულის ჩვენებით იკვეთება.
„ვიცი, რომ ნებისმიერ მკვლელს უნიშნავს სახელმწიფო ადვოკატს, ვიცი ეს ფორმალობა, მაგრამ ნუთუ, ეს ადვოკატი იმდენს ვერ ხვდება, რომ ვეფხია თავს როგორ იცავდა თაკოსგან, როცა ეს კაცი 100 კილო მაინც იქნება და ჩემი შვილი 40-50 კილო იყო? ან რომელი სპორტსმენი, ან მკვლელი მყავდა შვილი? ასეთი უტვინო ადვოკატი როგორ უნდა იყო?“, - აცხადებს ზვიად გამრეკელაშვილი.
მისივე განმარტებით, მკვლელობა თაკოს მცირეწლოვანი შვილების თვალწინ მოხდა.
„გაუბედურებული დედა, ნათია რომ წამოვიყვანე იმ დაწყევლილი სახლიდან, რაც ოთახი არსებობდა, ყველგან ჩემი შვილის სისხლი იყო. ბავშვებმა როგორ ვერ ნახეს მკვლელობა? მაშინ ვეფხიას ისინი მეზობელთან უნდა გაეყვანა. ყველა ოთახში ნათრევი იყო, ჩემი შვილი იბრძოდა, რომ მკვლელისგან თავი დაეღწია, მაცივარზეც კი ჰქონდა ბრჭყალებით ჩამოსმული.
ბებიას კი არ დაურიგებია ბავშვები, ასე თქვით, რომ მკვლელობას შეესწარით და ვეფხიას სამუდამოს მისცემენო. მათთან ფსიქოლოგებმა იმუშავეს, ეს კანონითაა სავალდებულო“, - დასძენს გამრეკელაშვილი.
თუკი, სასამართლო ბაქრაძეს უმაღლეს სასჯელს - უვადო პატიმრობას არ შეუფარდებს, ის საქმის ევროპულ სასამართლოში წაღებას გეგმავს.
„თუკი, მკვლელს 20 წელს მიუსჯიან და არა უვადოს, ევროპულ სასამართლოში წავა ეს საქმე! ქათმის ქურდსაც და ჩემი შვილის ასე სადისტურად მკვლელსაც ერთი და იმავე სასჯელი უნდა ჰქონდეთ?! მინდა, მას უვადო პატიმრობა ჰქონდეს, ოღონდ, სამართლიანად! შეიძლება აქციები ვერ გავმართო და მომიტინგე ვერ გავხდე, მაგრამ იმ ჯიგარს, რაც ამომაგლიჯეს, ვერავინ ჩამისვამს“, - აცხადებს გამრეკლაშვილის მამა.
შემდეგი სასამართლო სხდომა 21 სექტემბერს, 17:00 საათზეა ჩანიშნული.
ცნობისთვის, თაკო გამრეკელაშვილი მიმდინარე წლის 13 აპრილს, თბილისში, ბარნოვის ქუჩაზე მოკლეს. მას ყელი ჰქონდა გამოჭრილი. აღნიშნულ დანაშაულზე სამართალდამცავებმა მოკლულის მამინაცვალი, ვეფხია ბაქრაძე 14 აპრილს, თელეთში დააკავეს. ის მიმალვაში იმყოფებოდა.
გამოძიება 11 პრიმა 109-ე მუხლით მიმდინარეობს, რაც ოჯახში ძალადობის ნიადაგზე ჩადენილ განზრახ მკვლელობას დამამძიმებელ გარემოებაში გულისხმობს. აღნიშნული მუხლი 16-დან 20 წლამდე ან უვადო პატიმრობას ითვალისწინებს.
სამართალდამცველებმა ბარნოვის ქუჩაზე მომხდარი მკვლელობის საქმეზე კიდევ ერთი პირი, ბრალდებულ ვეფხია ბაქრაძის ბიძაშვილი, თემურ ბაქრაძე დაკავეს. მას ბრალი დანაშაულის შეუტყობინებლობისსთვის აქვს წაყენებული. ჩადენილი დანაშაული 2-დან 4 წლამდე ვადით თავისუფლების აღკვეთას ითვალისწინებს.
