ბარნოვზე 25 წლის თაკო გამრეკელაშვილის მკვლელობის საქმის პროკირორის, გია შაიშმელაშვილის განცხადებით, დღეს გამოკითხულმა მოწმეებმა დაინახეს, თუ როგორ გადახტა მკვლელობის შემდეგ ბრალდებული ფანჯრიდან და როგორ მიიმალა.
"დღევანდელ სასამართლო სხდომაზე სამი მოწმე დაიკითხა. აღნიშნული მოწმეები იყვნენ ის პირები, რომლებიც პირველები შევიდნენ დანაშაულის ჩადენის შემდეგ სახლში. მათ დაინახეს, თუ როგორ გადახტა სისხლიანი ბრალდებული ფანჯრიდან და შემთხვევის ადგილიდან მიიმალა", - აცხადებს შაიშმელაშვილი.
როგორც ის განმარტავს, იმაზე,, რომ ბრალდებულმა სასტიკი მკვლელობა მოკლულის მცირეწლოვანი ბავშვების თვალწინ ჩაიდინა, საქმის მასალები მოწმობს.
"თავად ვეფხია ბაქრაძე კი საუბრობს, რომ ბავშვების თვალწინ არ მომხდარა მკვლელობა, თუმცა საქმის გარემოებები სრულიად სხვა ვითარებას მიუთითებენ. ჩვენ დავკითხავთ არასრულწლოვან მოწმესაც, გამოვიკვლევთ კიდევ დამატებით გარემოებებს, რის მიხედვითაც ნამდვილად დადასტურდება, რომ ბრალდებულმა მცირეწლოვანი შვილების თვალწინ მოკლა დედა", - აცხადებს შაიშმელაშვილი.
ცნობისთვის, 13 აპრილს, თბილისში, ბარნოვის ქუჩაზე, 25 წლის თაკო გამრეკელაშვილი სასტიკად მოკლეს. არსებული ინფორმაციით, გამრეკელაშვილი მამინაცვალმა, ვეფხია ბაქრაძემ მცირეწლოვანი შვილების თანდასწრებით მოკლა.
ბრალდებული მიმალვაში იმყოფებოდა. სამართალდამცავებმა ის თელეთში დააკავეს.
