ზუგდიდის მერის მოადგილის გადადგომას "ერთიანი ნაციონალური მოძრაობის" ერთ-ერთი ლიდერი, ნიკა მელია "ჯი-ეიჩ-ენთან" ეხმაურება. როგორც ის განმარტავს, ვიცე-მერის განცხადება მის გადადგომასთან დაკავშირებით, ცინიკურია.
"ზუგდიდის მოქმედი მერი პრაღაში გააპარეს და პრაღიდან გააკეთა განცხადება თანამდებობის დატოვებასთან დაკავშირებით. მისი მოადგილე, ვინმე ბატონი გულორდავა, ტოვებს თანამდებობას, მაგრამ მიზეზად მოიშველია, რომ თითქოს, მას სახსრების ტკივილი დაეწყო და ეს ყველაფერი ზუგდიდის ნესტიან ჰავას უკავშირდება, რის გამოც იძულებულია, აღმოსავლეთ საქართველოში გადმოვიდეს საცხოვრებლად. ეს უკვე ცინიზმიც აღარ არის. იმის ნაცვლად, რომ ეს ადამიანები პასუხისგებაში იყვნენ მიცემული, ერთს პრაღაში აპარებენ, მეორე კი, ასეთ ცინიკურ განცხადებას აკეთებს", - აცხადებს მელია.
მისივე განმარტებით, მმართველი ძალის კორუფიცული სქემები ყოველდღიურად ვლინდება.
"მთელი სამეგრელოს პოლიტიკური ელიტა თავიდან ბოლომდე, როგორც მთელი საქართველოს მმართველი ძალა, ღრმად ჩაფლულია კორუფციაში. მოსახლეობა კი, სიღარიბეში. ყოველდღე, მაღალი თანამდებობის პირების კორუფციული სქემები იშიფრება. 95% ვინც, „ქართულ ოცნებაში“ მაღალ თანამდებობას იკავებს, საშოვარზეა მოსული", - დასძენს მელია.
