დიდგორზე მომზადებული კანონპროექტის შეჩერების გამო გაღიზიანებულიც ვარ, რადგან რთული მტკივნეული დღეები იყო, უმრავლესობის დატოვებასაც ვაპირებდი, - ამის შესახებ საპარლამენტო უმრავლესობის წევრმა ნუკრი ქანთარიამ განაცხადა.
მისი თქმით, უკვე მეცხრე მოწვევის პარლამენტი მუშაობს და დიდგორობის დღესასწაულის სახელმწიფო მნიშვნელობაში ატანა არავის გახსენებია.
„ყველაფერი ღიად უნდა ვთქვათ, ეს ჩემთვის საკმაოდ უხერხული და უსიამოვნო მომენტია. მნიშვნელოვანს რასაც დააგდებ და არ გაუფრთხილდები, მას სხვა აიღებს, რაც ლოგიკურია. ეს ყველაფერი ჩემთვის უხერხულობაა, რადგან კანონპროექტი პირველი მოსმენით გატანილია. უკვე მეცხრე მოწვევის პარლამენტი მუშაობს და დიდგორობის დღესასწაულის სახელმწიფო მნიშვნელობაში ატანა არავის გახსენებია. ეს არის დიდი გამარჯვების დღე, ეროვნული თვითშეგნებისთვის ამაღლებისთვის. დამარცხებულ დღეებს აღვნიშნავთ ხოლმე“, – განაცხადა ქანთარიამ, რომელმაც აქვე აღნიშნა, რომ მის მიერ მომზადებული კანონპროექტი პირველი მოსმენით იქნა განხილული და ამჟამად პროცესი ხელოვნურად არის გაჩერებული.
„ამით დამტკიცდა, რომ ჩვენი დამოუკიდებლობის ხარისხი საკმაოდ მყიფეა. საჭირო იყო დიპლომატიის ჩართვა, მაგრამ მაშინდელმა საგარეო უწყებამ უსუსურობა გამოამჟღავნა. ზოგიერთი ჩვენი კოლეგის მხრიდან სისინ-წიწინი იყო იმის ნაცვლად, რომ ინციატივა გაგვეტანა. არ ვფიქრობ, რომ ამას ჩვენი დაქცევა უნდა მოჰყოლოდა. იმის გამო, რომ კოლეგები უხერხულობაში არ ჩამეყენებინა, მაშინ თავი შევიკავე. პროცესი სიტყვიერად შეჩერებულია, გაჩერებულია და ჯანდაცვის კომიტეტს საშუალება არ ეძლევა, საკითხი მეორე მოსმენაზე გაიტანოს. ამის გამო გაღიზიანებულიც ვარ, რადგან რთული მტკივნეული დღეები იყო, უმრავლესობის დატოვებასაც ვაპირებდი. ავტორი მარტო რომ ვყოფილიყავი, ამის გაგრძელებას მოვითხოვდი, მაგრამ ანგარიში გავუწიეთ საერთაშორისო მდგომარეობას. ცვლილებების განხილვისას რაღაც უხერხულობა იქნება, რადგან თუ უმრავლესობა მხარს არ დაუჭერს, ეს იქნება ხელის გაწვნა, თუ დაუჭერს, ჯოხის ჩარტყმა იქნება, მაშინ პროცესი რატომ გაჩერდა? ყველაფერი ღიად უნდა ვთქვათ და თუ პრობლემა იყო, ახლა გაქრა? თუ ეს ამბავი გავა, სახელმწიფოს დონეზე უნდა გავიდეს“, – დასძინა ქანთარიამ.
ცნობისთვის,
პარლამენტის განათლებისა და მეცნიერების კომიტეტმა 12 აგვისტოს - დიდგორობის უქმე დღედ გამოცხადების საკანონმდებლო ინიციატივას მხარი დაუჭირა. კომიტეტმა დღევანდელ სხდომაზე ფრაქცია “საქართველოს პატრიოტების“ წევრის, ემზარ კვიციანის მიერ წარდგენილი, “შრომის კოდექსში“ ცვლილებების პროექტი განიხილა, რომლის მიხედვით, უქმე დღეების ჩამონათვალს 12 აგვისტო – დიდგორობა ემატება.
