საქართველოში რძე დეფიციტური ხდება, რაც მსოფლიო ბაზარზე რძისა და რძის ფხვნილის დეფიციტს უკავშირდება. ნედლეულის დეფიციტის გამო კი რძის პროდუქტების მწარმოებელი კომპანიები რძის ნაწარმის გაძვირებასაც გეგმავენ. ნაწილმა პროდუქცია 10 თეთრით უკვე გააძვირა. თუმცა კომპანიებში შემოდგომიდან ფასის ზრდის ტემპს ვეღარ პროგნოზირებენ.
რძის პროდუქტების მწარმოებელ კომპანია "ეკო-ფუდში" აცხადებენ, რომ ამ დროისათვის საქართველოში რძის საკმარისი რაოდენობაა.
"ჩვენი კომპანიის მაგალითზე შემიძლია გითხრათ, რომ ოქტომბრის ბოლომდე არის იმისი შესაძლებლობა, რომ კომპანის მოთხოვნა 100 %-ით დაკმაყოფილდეს და საწარმომ სათანადო რაოდენობის რძე მიიღოს. თუმცა მსოფლიო ბაზარზე კრიზისის გამო რძის ფხვნილის წარმოება მცირდება, რაც თავისთავად პროდუქციის ფასზეც აისახება. დღეისათვის "ეკო-ფუდი" მთლიანად რძეზე მუშაობს და კონკურენტების მსგავსად პროდუქციის ფასი არ გაგვიძვირებია", _ განუცხადა სააგენტო "ჯი-ეიჩ-ენს" "ეკო-ფუდის" მარკეტინგის მენეჯერმა შალვა ალავიძემ.
დედაქალაქში მეტ-ნაკლებად სტაბილური მდგომარეობის მიუხედავად, აჭარაში უკვე შეიქმნა რძის დეფიციტი, რაც არანაირად არ უკავშირდება ტურისტულ სეზონს.
აჭარაში მდებარე საჭამო "კახაბერში" აცხადებენ, რომ ნატურალურ რძეზე დეფიციტი უკვე შეიქმნა, რის გამოც კომპანიამ რძის ფხვნილის გამოყენება ნაადრევად დაიწყო.
"რძესა და რძის ფხვნილზე კრიზისის გამო წარმოება 50 %-ით შევამცირეთ. შექმნილი მდგომარეობის გამო ან ფასი უნდა გავეზარდა და შესაბამისად კლიენტებს ვკარგავდით, ან წარმოება უნდა შეგვემცირებინა. თუ კი პრობლემები გაგრძელდა, შესაძლია, კომპანიამ მუშაობა გააჩეროს კიდეც. დღეისათვის წარმოებაში 20 %-ს რძის ფხვნილს ვიყენებთ და ზამთრის პერიოდში შესაბამისად რძის ფხვნილის მოხმარებაც უნდა გავზარდოთ და ჩვენს პროდუქციაზე არსებული ფასების შენარჩუნებას როდემდე შევძლებთ ამ ეტაპზე არ ვიცით", - აცხადებენ რძის პროდუქტების მწარმოებელ კომპანია "კახაბერში".
მათივე ინფორმაციით, ბაზარზე მშრალ რძეზე ფასი თითქმის 100%-ით გაიზარდა და თუ რამდენიმე ხნის წინ რძის ფხვნილი 4 ლარი ღირდა, დღეისათვის კომპანია მას 8 ლარად ყიდულობს.
უახლოეს მომავალში რძეზე ფასის 15%-ით ზრდას ვარაუდობენ კომპანია "ვიმ-ბილ-დან ჯორჯიაში", რომელიც ბაზარზე "სოფლის ნობათის" სახელწოდებითაა ცნობილი.
"სოფლის ნობათს" დღეისათვის რძის მიღებაზე პრობლემა არ აქვს, თუმცა სექტემბრიდან აუცილებლად შეგვექმნება, რადგანაც ჯერ ერთი ზამთარი მოდის და რძის მიწოდებაც მცირდება, რასაც თან კრიზისის გამო გამოწვეული დეფიციტიც ერთვის. ვვარაუდობთ, რომ სექტებრიდან რძის ფასი 15 %-ით გაძვირდება, შესაბამისად, რამდენით მოიმატებს პროდუქციის ღირებულება ჯერ არ ვიცით. ამ ეტაპზე მთლიანად რძეზე ვართ დამოკიდებული და სექმტემბრიდან რძის ფხვნილის გამოყენებასაც დავიწყებთ, რომელიც ძვირდება", - განუცხადეს "ჯი-ეიჩ-ენს" "ვიმ-ბილ-დან ჯორჯიას" მარკეტინგის სამსახურში.
კომპანიების მიერ გაკეთებულ პროგნოზს ექსპერტებიც ეთანხმებიან, თუმცა რძის პროდუქტებზე ფასების მნიშვნელოვან მატებას ნოემბრიდან ვარაუდობენ.
ექსპერტი მეცხოველეობის საკითხებში გიორგი ხატიაშვილი ამბობს, რომ რძის ნაწარმის გაძვირება ნოემბრიდანაა მოსალოდნელი, რადგანაც რძე ნოენბრიდან გაძვირდება.
"დღეისათვის ადგილობრივ ბაზარზე რძის ფასი, უმნიშვნელოდ, 5-10 თეთრით გაიზარდა. მსხვილი კომპანიები ამ დროისათვის საღ რძეზე მუშაობენ და ზამთრის დადგომასთან ერთად რძის ფხვნილის გამოყენება მოუწევთ. რძის ფხვნილის იმპორტი დღეისათვის უკრაინიდან, აშშ-დან, ბელორუსიდან და ჰოლანდიიდან ხორციელდება. 15 დღის წინ მიწოდება და მოთხოვნა დაბალანსებული იყო, თუმცა დღეისათვის მოთხოვნა დიდია და მიწოდება თანდათან დეფიციტური ხდება", - განუცხადა "ჯი-ეიჩ-ენს" გიორგი ხატიაშვილმა.
მსოფლიოში რძის ფასის ზრდა ძირითადად კლიმატურ პირობებსა და მოუსავლიანობას უკავშირდება, რამაც რძის წარმოება მაქსიმალურად შემცირა და ბაზარზე როგორც საღი ასევე მშრალი რძის დეფიციტი წარმოიქმნა. მთელი როგორ ქვეყნების ბაზრებზე, განსაკუთრებით კი რუსეთში რძის დეფიციტის გამო ადგილი აქვს სპეკულაციურ გარიგებებს, რაც ფასების დამატებით ზრდას იწვევს.