იანვარ-ივლისში საქართველოს საგარეო სავაჭრო ბრუნვამ (არაორგანიზებული ვაჭრობის გარეშე) 3507 მლნ. აშშ დოლარი შეადგინა, რაც წინა წლის ანალოგიურ მაჩვენებელზე 18 პროცენტით მეტია.
"საქსტატის" ინფორმაციით, შვიდ თვეში ქვეყნის საგარეო სავაჭრო ბრუნვაში ექსპორტი 865 მლნ. აშშ დოლარი იყო (41 პროცენტით მეტი), ხოლო იმპორტი - 2642 მლნ. აშშ დოლარი (12 პროცენტით მეტი) იყო.
საქართველოს უარყოფითმა სავაჭრო ბალანსმა 2010 წლის იანვარ-ივლისში 1777 მლნ. აშშ დოლარი შეადგინა (1 პროცენტით მეტი). 2010 წლის იანვარ-ივლისში 2008 წლის ანალოგიურ პერიოდთან შედარებით საგარეო სავაჭრო ბრუნვა 27 პროცენტით, ექსპორტი 10 პროცენტით, ხოლო იმპორტი 31 პროცენტით შემცირდა. რაც შეეხება უარყოფით სავაჭრო ბალანსს, 2010 წლის იანვარ-ივლისში 38 პროცენტით ნაკლები დაფიქსირდა, ვიდრე 2008 წლის შესაბამის პერიოდში.
2010 წლის იანვარ-ივლისში საქართველოს საგარეო სავაჭრო ბრუნვამ ევროკავშირის ქვეყნებთან 913 მლნ. აშშ დოლარი შეადგინა, რაც წინა წლის შესაბამის მაჩვენებელზე 10 პროცენტით მეტია; აქედან ექსპორტი 156 მლნ. აშშ დოლარი იყო (23 პროცენტით მეტი), ხოლო იმპორტი - 757 მლნ. აშშ დოლარი (8 პროცენტით მეტი). საქართველოს საგარეო სავაჭრო ბრუნვაში ამ ქვეყნების წილმა 26 პროცენტი შეადგინა, მათ შორის ექსპორტში 18 პროცენტი და იმპორტში 29 პროცენტი.
დსთ-ის ქვეყნებთან საგარეო სავაჭრო ბრუნვამ 2010 წლის იანვარ-ივლისში 1136 მლნ. აშშ დოლარი შეადგინა (2009 წლის იანვარ-ივლისთან შედარებით 28 პროცენტით მეტი), აქედან ექსპორტი 344 მლნ. აშშ დოლარი დაფიქსირდა (58 პროცენტით მეტი), ხოლო იმპორტი - 792 მლნ. აშშ დოლარი (19 პროცენტით მეტი). საქართველოს საგარეო სავაჭრო ბრუნვაში ამ ქვეყნების წილი 32 პროცენტი იყო, მათ შორის ექსპორტში 40 პროცენტი და იმპორტში 30 პროცენტი. (2009 წლის იანვარ-ივლისში - შესაბამისად 30, 36 და 28 პროცენტი). ამ ქვეყნებზე მოდიოდა სავაჭრო დეფიციტის 25 პროცენტი (2009 წლის იანვარ-ივლისში - 26 პროცენტი).
2010 წლის იანვარ-ივლისში ათი უმსხვილესი სავაჭრო პარტნიორის წილმა საქართველოს მთლიან საგარეო სავაჭრო ბრუნვაში 67 პროცენტი შეადგინა. უმსხვილეს სავაჭრო პარტნიორებს შორის იყო თურქეთი (587 მლნ. აშშ დოლარი), აზერბაიჯანი (369 მლნ. აშშ დოლარი) და უკრაინა (341 მლნ. აშშ დოლარი).
სასაქონლო ჯგუფებიდან საექსპორტო ათეულში პირველი ადგილი კვლავ ფეროშენადნობებმა დაიკავა - მის წილად ექსპორტის 17 პროცენტი მოდიოდა და 145 მლნ. აშშ დოლარი შეადგინა. მსუბუქი ავტომობილების ექსპორტმა შეადგინა 107 მლნ. აშშ დოლარი, რაც ექსპორტის 12 პროცენტი იყო. მესამე ადგილზე კვლავ შავი ლითონების ჯართი დარჩა. ამ სასაქონლო ჯგუფის ექსპორტი 27 მლნ. აშშ დოლარით გაიზარდა და 66 მლნ. აშშ დოლარი შეადგინა.
უმსხვილესი საიმპორტო სასაქონლო ჯგუფი 2010 წლის იანვარ-ივლისში ნავთობი და ნავთობპროდუქტები იყო 347 მლნ. აშშ დოლარით, რომლის წილმა იმპორტში 13 პროცენტი შეადგინა. მეორე ადგილზე იმყოფებოდა მსუბუქი ავტომობილების სასაქონლო ჯგუფი 174 მლნ. აშშ დოლარით, რაც იმპორტის 7 პროცენტი იყო. მესამე ადგილზე კვლავ სამკურნალო საშუალებების ჯგუფის იმპორტია 110 მლნ. აშშ დოლარით, რომლის წილმა იმპორტში 4 პროცენტი შეადგინა.