ჩვენ ალბათ, უნდა ველოდოთ ძალიან ხმაურიან პროცესებს უკვე კვირიკაშვილის გუნდის წინააღმდეგ, ეს პრაქტიკულად დააანონსა ივანიშვილმა, – ამის შესახებ „ნაციონალური მოძრაობის“ წარმომადგენელმა ზაალ უდუმაშვილმა „ქართული ოცნების“ თავმჯდომარის ბიძინა ივანიშვილის ინტერვიუსთან დაკავშირებით განაცხადა.
მისი თქმით, ის, რომ ქვეყანაში ჭარბვალიანობა და ეკონომიკური სიდუხჭირეა, ამას ოპოზიცია ექვსი წელია ამბობს, თუმცა ბიძინა ივანიშვილიც იძულებული გახდა ეს ოფიციალურად დაედასტურებინა.
„საქართველოს მოსახლეობის უდიდესი ნაწილი სწორედ დღეს არის ბანკის მძევალი და ეს ბანკების დანაშაული კი არ არის, ეს არის ივანიშვილის დანაშაული, რომელმაც თავად შეუწყო ხელი ასეთი სისტემის ჩამოყალიბებას. ის ყოველთვის პასუხისმგებლობას აკისრებს სხვას იმ შეცდომაზე, რომელიც დაშვებული არის „ქართული ოცნების“ მხრიდან. ამ შემთხვევაში, განტევების ვაცი არის გიორგი კვირიკაშვილი. მან გუშინ პირდაპირ ფეხები შეაწმინდა ყოფილ პრემიერს და ყველაფერი, რაც ცუდი ხდებოდა და ხდება ამ ქვეყანაში, გადააბრალა კვირიკაშვილს და მის გუნდს. შესაბამისად, ჩვენ ალბათ, უნდა ველოდოთ ძალიან ხმაურიან პროცესებს უკვე კვირიკაშვილის გუნდის წინააღმდეგ, ეს პრაქტიკულად დააანონსა ივანიშვილმა“, – განუცხადა უდუმაშვილმა საზოგადოებრივს.
