ბრალდებული ანატოლი ბერძენიშვილი სასამართლოს დღევანდელ სხდომაზე დუმილს დაარღვევს და ისაუბრებს, თუ როგორ შემოვიდა საქართველოში ახმედ ჩატაევი, - განაცხადა პროცესის დაწყებამდე ჟურნალისტებთან ტერორისტული საქმიანობის მხარდაჭერაში ბრალდებულ ბერძენიშვილის ადვოკატმა ინგა ბოლოთაურმა.
როგორც ის აღნიშნავს, დღევანდელ პროცესზე ბერძენიშვილის გარდა, ექსპერტიც დაიკითხება.
"დღეს დავკითხავთ, ჩვენს მიერ მოწვეულ ექსპერტს და ასევე დაიკითხება ჩემი დაცვის ქვეშ მყოფი ანატოლი ბერძენიშვილი, რომელიც მისცემს სასამართლოს ჩვენებას. როგორც იცით, ანატოლი ბერძენიშვილი გამოძიების ეტაპზე იყენებდა დუმილის უფლებას, დღეს ამ უფლებას არღვევს და სასამართლოს მისცემს ჩვენებას, სადაც გამოკვეთს ძალიან მნიშვნელოვან ფაქტობრივ გარემოებებს, რაც სისხლის სამართლის საქმეში არ ყოფილა გამოკვლეული და ბევრ, საინტერესო საკითხს ნათელს მოჰფენს ანატოლი ბერძენიშვილი", -განაცხადა ბოლოთაურმა.
ცნობისთვის, პანკისის ხეობაში ჩატარებული სპეცოპერაციას, სუს-ის კონტრტერორისტულმა დეპარტამენტმა ტერორიზმში ბრალდებულთა ჯგუფთან კავშირზე მყოფი სხვა პირები რუსლან ალდამოვი, ბადურ ჩოფანაშვილი, რამაზ მარგოშვილი და ზურაბ გორნაკაშვილი დააკავა. კიდევ ორი პირი ანატოლი ბერძენიშვილი და ზურაბ იდოიძე სახელმწიფო უსაფრთხოების სამსახურმა მოგვიანებით დააკავა. ყველა მათგანს გამოძიება ტერორისტული საქმიანობის სხვაგვარ მატერიალურ მხარდაჭერას და რესურსებით უზრუნველყოფას ედავება.
