„გამოძიების მიერ ძალიან მალე ოპერატიული გზებით დადგინდა, რომ არ გვქონდა საქმე დაგეგმილ მკვლელობასთან და ეს იყო სპონტანური მკვლელობა,“ - ამის შესახებ ხორავას ქუჩაზე მომხდარი საქმის გამომძიებელმა, ირაკლი ფიფიამ, პარლამენტის საგამოძიებო კომისიის სხდომაზე განაცხადა. “ეს დადგინდა ოპერატიულად და ასევე, საქმის მასალებით დგინდება. როდესაც არასრულწლოვნები ხორავას #4-ში მიდიან, სადაც იწყება საუბარი, ყველაფერი შერიგებისკენ მიდის. ფაქტობრივად ბავშვები შერიგებული არიან. მხოლოდ ამის შემდეგ მოხდა ორ არასრულწლოვანს შორის შელაპარაკება, რაც ფიზიკურ დაპირისპირებაში გადაიზარდა. სწორედ ამის შემდეგ მოხდა სასიკვდილო ჭრილობების მიყენება ორი პირისთვის. შესაბამისად, აქ დაგეგმილ მკვლელობაზე არ არის საუბარი. ეს იყო სპონტანური მკვლელობა,“ - განაცხადა ირაკლი ფიფიამ.
ხორავას ქუჩაზე მომხდარი მკვლელობის საქმის საგამოძიებო კომისიის სხდომაზე საქმის უშუალო გამომძიებლის - ირაკლი ფიფიას, დეტექტივების - სამმართველოს უფროსის, იოსებ სიგუას, თბილისის პოლიციის დეპარტამენტის უფროსის, შალვა ბედოიძის ახსნა-განმარტებების მოსმენა დაიწყო.
