ჩემი მთავარი გზავნილია ის, რომ არავინ აპირებს ფოკუსირებას იმ 9 წელზე, ჩვენ ფოკუსირებული უნდა ვიყოთ მომავალზე და ჩვენი პროგრამა ორიენტირებულია კონკრეტულ შედეგებზე, - ამის შესახებ საქართველოს პრემიერ-მინისტრობის კანდიდატმა მამუკა ბახტაძემ პარლამენტში სიტყვით გამოსვლისას.
როგორც ბახტაძემ განმარტა, მთავრობა მაქსიმალურად უნდა იყოს ორიენტირებული იმ რეალური პრობლემების გადაწყვეტაზე, რაც დღეს ქვეყანაში არსებობს.
„მე აღვნიშნე ძალიან მნიშვნელოვანი წინაპირობა იმისთვის, რომ ვიყოთ ეფექტურები ამ პრობლემის გადაწყვეტაში - დღეს ჩვენი მმართველობითი ორგანოები საჭიროებენ მეტ ეფექტურობას, მეტ ოპერატიულობას, განსაკუთრებით იმ საკითხში, რასაც ჰქვია ოპერატიულობა გადაწყვეტილების მიღებიდან იმ კონკრეტულ ვადამდე, როდესაც ამ გადაწყვეტილებიდან გამომდინარე არსებული სერვისი ან სიკეთე მივა თითოეულ მოქალაქემდე. აქედან გამომდინარე ვამბობ, რომ მცირე მთავრობის კონცეფცია არის აუცილებელი წინაპირობა, რათა ჩვენ სწრაფად და ეფექტურად განვახორციელოთ წარმოდგენილი პროგრამა. აქვე მინდა შევეხო გუშინდელ შეხვედრებს პოლიტიკურ ჯგუფებთან. ჩემი აზრით, საზოგადოებისთვის ეს იყო კიდევ რთი ნათელი მაგალითი იმისა, როგორ ვითარდება არსებული პოლიტიკური კომუნიკაცია, რაც დღეს გვაქვს საქართველოში.
სამწუხაროდ, ჩვენ კიდევ ერთხელ ვიხილეთ ის, რომ წარმოდგენილ პროგრამაზე ვერ მოვისმინეთ ვერც ერთი მნიშვნელოვანი შენიშვნა. უფრო მეტიც, მოვისმინეთ ძალიან ბევრი ისეთი ბრალდება, რომელიც ბუნებაში არ არსებობს, დაწყებული იმით, თითქოს აუდიტის სამსახურს არ ჰქონდა უფლება და ვერ შევიდა რკინიგზაში კონკრეტული აუდიტის დასკვნის დასადებად. მას 2017 წელს აქვს ეს დასკვნა გაკეთებული და შეგიძლიათ, ეს კიდევ ერთხელ იხილოთ; თითქოს ჩვენ საქართველოში გავაუარესეთ საგადასახადო ტვირთი - ამაზეც დამატებით მოგახსენებთ. მე ნამდვილად პირდაპირ და გულწრფელად გეუბნებით, ჩვენთვის და ჩვენი გუნდისთვის ის 9-წლიანი მმართველობის პერიოდი არ არის ორიენტირი, რომელზეც უნდა ავაგოთ გეზი.
ნამდვილად არ ვაპირებ წარსულზე საუბარს. მინდა, ვისაუბრო მომავალზე და იმ კონკრეტულ საქმეებზე, რაც უნდა გავუკეთოთ ქართველ ხალხს. მაგრამ, როდესაც როდესაც ჩვენ ვისმენთ ისეთ უსაფუძვლო ბრალდებებს, როგორიც იყო გუშინ, რა თქმაა უნდა, გიპასუხებთ, რა სტატისტიკა ჰქონდა ჩვენს წინამორბედს. ძალიან გთხოვთ, ეს ყველაფერი მიიღოთ ისე, როგორც არის რეალურად, მაგრამ ჩემი მთავარი გზავნილია ის, რომ არავინ აპირებს ფოკუსირებას იმ 9 წელზე, ჩვენ ფოკუსირებული უნდა ვიყოთ მომავალზე, კონკრეტული პრობლემების გადაჭრაზე, როგორ მოვახერხოთ იმ ძირითად გამოწვევებთან გამკლავება, რაც ჩვენი ერის წინაშეა. აქედან გამომდინარე, პროგრამა ორიენტირებულია კონკრეტულ შედეგებზე და ვისურვებდი, დისკუსია წარმართული იყოს შინაარსობრივად, ვინაიდან პირველ რიგში მმართველი ძალისა და მთავრობისთვის იქნება ეს ძალიან მნიშვნელოვანი, რადგან თუ არსებობს ხარვეზები ამ პროგრამაში, ვნახოთ კონკრეტულად რაშია ეს. მაგრამ, კიდევ ერთხელ ვიმეორებ, ასეთი რამ, სამწუხაროდ, ვერ მოვისმინე”, - აღნიშნა მამუკა ბახტაძე.
