თბილისის საქალაქო სასამართლოში ადვოკატები „ქართული მარშის“ დაკავებული წევრების გირაოთი გათავისუფლებას ითხოვენ. დაცვის მხარემ სასამართლოს ლადო სადღობელაშვილის პატიმრობის სანაცვლოდ 5 ათასი ლარი შესთავაზა, ხოლო სხვა ბრალდებულების სანაცვლოდ 2-2 ათას ლარიანი გირაო.
დაკავებულებს ბრალად ედებათ წინასწარი შეთანხმებით ჯგუფური ხულიგნობა, თუმცა მათგან ერთს გამოძიება დამატებით ცემას, ერთს კი სხვისი ნივთის დაზიანებას ედავება.
ცნობისთვის, „ქართული მარშის“ წევრები ტელეკომპანია „რუსთავი ორთან“ მომხდარი ინციდენტის გამო, სისხლის სამართლის წესით 21 მარტს დააკავეს. „რუსთავი ორის“ შენობასთან „ქართული მარშის“ წევრებმა აქცია 19 მარტს გამართეს. აქციის მონაწილეებმა ჟურნალისტ გიორგი გაბუნიას გზა გადაუკეტეს და აცხადებდნენ, რომ ქრისტიანებისთვის შეურაცხმყოფელი განცხადების გამო, მან ბოდიში უნდა მოიხადოს.
