თბილისის საქალაქო სასამართლოში დღეს, 7 ივნისს, 10:00 საათზე, ანა დოლიძის აცილების შესახებ საბჭოს მიერ მიღებული გადაწყვეტილებების შესახებ სარჩელის განხილვა დაიწყება.
აღნიშნული სარჩელი სასამართლოში საია-მ შეიტანა.
საქართველოს ახალგაზრდა იურისტთა ასოციაცია მიიჩნევს, რომ იუსტიციის უმაღლესი საბჭოს მიერ უსაფუძვლო აცილებების შესახებ მიღებული გადაწყვეტილებებით დაირღვა ანა დოლიძის, როგორც იუსტიციის უმაღლესი საბჭოს წევრის უფლება, მისთვის მინიჭებული უფლებამოსილებები განეხორციელებინა თავისუფლად და შეუფერხებლად.
ცნობისთვის, პრეზიდენტმა გიორგი მარგველაშვილმა იუსტიციის უმაღლესი საბჭოს წევრის ვაკანტურ თანამდებობაზე ანა დოლიძე 8 იანვარს დანიშნა. დოლიძის აცილება მოსამართლეებმა მოითხოვეს. საიაში განმარტავენ, რომ შეზღუდვა დოლიძის მიმართ იყო დაუსაბუთებელი და ამით მისი, როგორც საბჭოს წევრის კონსტიტუციური უფლება დაირღვა.
