ინფორმაციას, რომლის მიხედვითაც, ხორავას ქუჩაზე სისხლიანი გარჩევის საქმეზე მოწმის სახით გამოკითხულმა არასრულწლოვანმა გ.მ.-მ ქვეყანა დატოვა, მისი ოჯახის ადვოკატი, დავით დადიანი „ჯი-ეიჩ-ენთან“ არც ადასტურებს და არც უარყოფს.
„ეს კითხვა შინაგან საქმეთა სამინისტროს დაუსვით, ქვეყნის დატოვება-არ დატოვების, საზღვრის კვეთის შესახებ ინფორმაცია მე არ მაქვს. არასრულწლოვანთან დაკავშირებული ყველა ინფორმაცია საიდუმლოა, უფლება არ მაქვს თქვენთან რაიმე ინფორმაცია გავაჟღერო“, - აცხადებს დადიანი.
განაჩენის გამოცხადების შემდეგ, შსს-ში განახლებული ძიების ფარგლებში გამოიკითხა, თუ არა აღნიშნული არასრულწლოვანი, როგორც ადვოკატი განმარტავს, ეს ფაქტი მისთვის ცნობილი არ არის. განახლებულ ძიებამდე, გ.მ.-მ ჩვენება პროკურატურას ოთხჯერ მისცა.
„სასამართლოს შემდეგ გამოკითხვაზე რომ დაებარებინათ, მაცნობებდნენ, ჩემთვის ეს არავის უცნობებია“, - დასძენს დადიანი.
ცნობისთვის, ხორავას ქუჩაზე მოკლული დავით სარალიძისა და ლევან დადუნაშვილის საქმეზე დაკითხული ერთ-ერთი მოწმის ჩვენებით, სარალიძეს რაღაც საგანს უკნიდან არასრულწლოვანი გ.მ. ურტყამდა. სწორედ მას მოიაზრებს დაზარალებულის უფლებამონაცვლე სარალიძე მისი შვილის მკვლელობის საქმეზე ერთ-ერთ ბრალდებულად, რომელიც ამ დრომდე მხოლოდ მოწმის სახითაა გამოკითხული.
როგორც ირკვევა, არასრულწლოვანი სასულიერო პირის, შიო მენაბდის შვილია.
დატოვა თუ არა არასრულწლოვანმა ქვეყანა, ამ კითხვით „ჯი-ეიჩ-ენმა“ შინაგან საქმეთა სამინისტროს მიმართა. უწყებაში განმარტავენ, რომ აღიშნულს გაარკვევენ და კომენტარს ამის შემდეგ გააკეთებენ.