ამბავი სოფელ სიმონეთიდან დაიწყო და მთავარი პროკურატურის კედლებში გაჩერდა. ჩვენი რესპონდენტი ორი შვილის დედაა, რომელიც ორ ობოლს მარტო ზრდის. გასაჭირს წლებია უმკლავდება და ყველას ყველგან უყვება. ახალი ამბების საგენტო „ჯი-ეიჩ-ენთან“ თავის ტრაგედიაზე კიდევ ერთხელ საუბრობს. შორენა თევზაძე საქმის ხელახალ გამოძიებას ითხოვს.
გთავაზობთ, ცხელიშვილის მეუღლის შორენა თევზაძის განცხადებას:
"ჩემს მეუღლეს ღამით თბილისიდან მომავალი ტაქსის მძღოლი დაეჯახა და გარდაცვლილი ქუჩაში დამიტოვა. მომხდარზე აღიძრა სისხლის სამართლის საქმე, მაგრამ გამოძიება არ დასრულდა. დღემდე არავინ დასჯილა. ვითხოვ ობიექტურ გამოძიებას და მკვლელის დასჯას. 35 წლის ასაკში დავქვრივდი. ვარ ინვალიდი, ორი შვილი მყავს გოგონა და ვაჟი. ვის მივმართო აღარ ვიცი. ადამიანი მოკლა, ჩიტი ხომ არა? დამინგრია ოჯახი და პასუხს არავინ აგებს ამაზე. როგორ გავზარდო ორი ობოლი? გამოძიებამ კი საქმე დამიხურა, რამდენჯერმე მოვითხოვე ამ საქმის ხელახალი გამოძიება, რა მოხდა, რის გამო დამიხურეს საქმე? არ ვიცი. როდესაც ეს უბედური შემთხვევა მოხდა და მეუღლე სახლში მომისვენეს, ბავშვს ვბანდი, მითხარით რა ჭკუაზე დავდგებოდი, დავრჩი ფეხით ინვალიდი. ვცხოვრობ სოფელში. არ მაქვს არანაირი დახმარება, არანაირი შემოსავლის წყარო, ერთადერთი ჩემი შემოსავლის წყარო ჩემი გარდაცვლილი ქმარი იყო, დავრჩი ასე ვთქვათ, ქუჩაში, შიმშილს შევეგუები, მაგრამ ქმრის სიკვდილს? და მერე როგორს? მომიკლეს ქმარი და მკვლელი 5 დღითაც არ მჯდარა ციხეში, უკანონოს არაფერს ვითხოვ, მხოლოდ იმას ვითხოვ, რომ საქმე ხელახლა გამოიძიონ. მეტი არაფერი მინდა. ვიცი რომ შემთხვევით მოხდა ეს ყველაფერი, მაგრამ ხომ შეიძლება აღიარო. მან კი ჩემ გარდაცვლილ ქმარს დააბრალა შემომიხტა ბორბლებშიო? როგორ შეუხტებოდა დახლზე დამჯდარი კაცი მანქანას? თავად შეუხტა დახლზე და მიაჭყლიტა ამხელა კაცი ბუზივით... თავიდან თვითმხილველები იყვნენ, მაგრამ მერე ყველა გააჩუმა! იცის არავინ მყავს და ვერაფერს ვუზავ, მაგრამ იმდენს კი ვიზამ, რომ ჩემი ორი შვილით გამოვალ სიმონეთის ცენტრში და მანქანას შეუვარდები და მერე რას იზავენ დავინახავ, მეტი გზა მე არ დამრჩენია”,- განმარტავს ცხელიშვილის ქვრივი შორენა თევზაძე.
ცნობისთვის, 2012 წლის 12 სექტემბერს თბილისის-სენაკი-ლესელიძის სავტომობილო გზაზე მოხდა ავტოსაგზაო შემთხვევა, დაიღუპა ფეხით მოსიარულე სიმონეთის მკვიდრი ვასილ ცხელიშვილი. აღნიშნული სისხლის სამართლის საქმე გადაეცა ქუთაისის მთავარ სამმართველოს. სამმართველოში განგვიცხადეს - მომხდართან დაკავშირებით საქმე დახურულია და თვაიდან გამოძიება ჯერჯერობით არ იგეგმება. შსს-ში კი განმარტავენ რომ სარჩელი მომხდარზე მაშინ არ დაკმაყოფილდა. ახლა კი საქმის ხელახალი გასაჩივრებისთვის გარდაცვლილის მეუღლემ ძალოვან უწყებას თავად უნდა მიმართოს.
