ავიაკომპანიები ბილეთების ღირებულებას ხშირად ცვლიან. როგორც ქუთაისის საერთაშორისო აეროპორტის Facebook-ის გვერდზე განთავსებულ ინფორმაციაშია აღნიშნული, ამის მიზეზი ბევრ ფაქტორზეა დამოკიდებული: სეზონი, თარიღი, დღესასწაულები, უქმე და სამუშაო დღეები, რამდენად დიდია მოთხოვნა ამა თუ იმ მიმართულებაზე და ა.შ.
თუმცა, არსებობს რამდენიმე მარტივი მეთოდი, რომლის გათვალისწინებითაც შეგიძლიათ, ბილეთი უფრო დაბალ ღირებულებაში შეიძინოთ:
დაგეგმეთ მოგზაურობა წინასწარ - მოიფიქრეთ, რომელი ქალაქის ნახვა გსურთ და თვალი ადევნეთ ავიაკომპანიის ვებგვერდს. თუ ბილეთის შეძენა დაბალ ფასად გსურთ, ამაზე გაფრენამდე მინიმუმ 3-5 თვით ადრე მაინც უნდა იზრუნოთ.
გამოიწერეთ სიახლეები ავიაკომპანიის ვებგვერდიდან - ამ გზით, ელფოსტის მეშვეობით მუდმივად მიიღებთ შეტყობინებებს სპეციალური შეთავაზებების შესახებ და დიდი შანსია, რომ თქვენთვის ხელსაყრელი ტარიფი არ გამოგრჩებათ.
თვალი ადევნეთ მნიშვნელოვან თარიღებს - აღდგომა, ახალი წელი, ვალენტინობა ან თუნდაც ავიაკომპანიის დაბადების დღე - როგორც წესი, ასეთ თარიღებში ავიაკომპანიები მსხვილ-მსხვილ ფასდაკლებებს არ იშურებენ. ჩაუსაფრდით და არ გაუშვათ შანსი ხელიდან.
იმგზავრეთ მხოლოდ ხელბარგით - კარგად გაიაზრეთ, გჭირდებათ ერთ კვირაში 3 კაბა, 4 შარვალი და რამდენიმე წყვილი ფეხსაცმელი? მოიშორეთ ზედმეტი ნივთები, შეიმსუბუქეთ მგზავრობა და დაზოგეთ ფული.
გაწევრიანდით ფასდაკლების კლუბში - ავიაკომპანიების უმეტესობა განსაკუთრებულ ტარიფებს სთავაზობს მათ, ვინც ხშირად მოგზაურობს. ამიტომ მოიძიეთ ინფორმაცია ვებგვერდზე, გაწევრიანდით ფასდაკლების კლუბში და სხვაობას თავადაც დაინახავთ.
