პრეზიდენტს საგამონაკლისო წესით მოქალაქეობის მინიჭების უფლება აღარ ექნება. საქართველოს მოქალაქეობასთან დაკავშირებული საკითხების განმხილველი კომისიის უფლებამოსილება კი ფართოვდება. ამასთან დაკავშირებით ცვლილებები “მოქალაქეობის შესახებ“ კანონში შედის.
კანონპროექტი, რომელიც პარლამენტის იურიდიული კომიტეტის მიერ არის მომზადებული და არსებული კანონის კონსტიტუციის ახალი რედაქციის პრინციპებთან შესაბამისობაში მოყვანას ითვალისწინებს, დღეს პარლამენტის ბიუროს სხდომაზე დარეგისტრირდა.
“მოქალაქეობის შესახებ“ კანონში დაგეგმილი ცვლილებებით, პრეზიდენტს აღარ ექნება მოქალაქეობის საკითხის განხილვასთან დაკავშირებული რიგი საკითხების რეგულირების კომპეტენცია. ერთ-ერთი ცვლილებით, საგამონაკლისო წესით გათვალისწინებულ შემთხვევაში, პირი საქართველოს მოქალაქეობის მინიჭების თაობაზე განცხადებას პრეზიდენტს აღარ წარუდგენს. განცხადება წარედგინება სააგენტოს, საზღვარგარეთ დიპლომატიურ წარმომადგენლობას ან საკონსულო დაწესებულებას.
გარდა ამისა, მოქალაქეობის მინიჭების, შეწყვეტის, დაკარგვის წესი, აგრეთვე საქართველოს საპატიო მოქალაქის მინიჭების წესი პრეზიდენტის ბრძანების ნაცვლად, მოქალაქეობის საკითხთა კომისიის დადგენილებით განისაზღვრება.
ცვლილებებით ასევე გათვალისწინებულია, რომ საქართველოს მოქალაქეობასთან დაკავშირებული საკითხების განმხილველი კომისიის დაკომპლექტების წესი შეიცვლება. ამასთან, კომისიის საქმიანობის წესი თავად კომისიის მიერ დამტკიცებული დებულებით განისაზღვრება.
ცვლილებების მიხედვით, კომისია ექვსი წევრისგან შედგება, რომელსაც სახელმწიფო სერვისების განვითარების სააგენტოს თავმჯდომარე დანიშნავს. პროექტის გათვალისწინებით, კომისიის ორი წევრი, მათ შორის კომისიის თავმჯდომარე, სააგენტოს თანამშრომლებისგან დაინიშნება, ორი წევრი - სახელმწიფო უსაფრთხოების სამსახურის და ორი წევრი - პრეზიდენტის ადმინისტრაციის მოსამსახურეებისგან, ამ უწყებების წარდგინებით.
ეროვნული უშიშროების საბჭოს წარმომადგენელი კომისიის წევრი აღარ იქნება.
