ახლად დაფუძნებული უკრაინული ავიაკომპანია SkyUp-ი კიევი-ბათუმის მიმართულებით რეგულარული რეისების დაწყებას გეგმავს. ავიაკომპანიამ უკრაინის საავიაციო ხელისუფლებას ოფიციალურად უკვე მიმართა, რათა 1-ელი ივნისიდან შიდა და საერთაშორისო რეგულარული რეისების განხორციელების ნებართვა მიიღოს.
საერთაშორისო მიმართულებების ჩამონათვალში, სადაც SkyUp-ს სურს ფრენა, ბათუმიცაა.
როგორც უკრაინული მედია წერს, SkyUp-მა განაცხადი შეიტანა კიევიდან შემდეგი საერთაშორისო მიმართულებებით ფრენების უფლების მიღებისთვის: ბათუმი, ბარსელონა, ლარნაკა, რომი, ალიკანტე, პალმა-დე-მაიორკა, ბურგასი და ვარნა.
ხოლო ხარკოვიდან SkyUp-ს ფრენა სურს ბარსელონას, ლარნაკას, რომისა და ბურგასის მიმართულებით, ასევე ლვოვიდან ბარსელონასა და ლარნაკას მიმართულებით. ასევე შესაბამისი ნებართვის მიღების შემდეგ, SkyUp-ი რეისებს განახორციელებს ზაპოროჟიედან ბარსელონას, ოდესიდან კი ბარსელონას, რომისა და ლარნაკას მიმართულებით. როგორც ცნობილია ავიაკომპანია SkyUp-ი კიევის ჟულიანის აეროპორტში იქნება ბაზირებული.
საქართველოს სამოქალაქო ავიაციის სააგენტოში განმარტავენ, რომ ამ ეტაპზე ავიაკომპანია SkyUp-ს ეკონომიკისა და მდგრადი განვითარების სამინისტროს სამოქალაქო ავიაციის სააგენტოში განაცხადი არ შეუტანია.
ავიაკომპანიამ პირველი ჩარტერული ავიარეისი, 19 მაისს კიევიდან შარლ ელ-შეიხის მიმართულებით უკვე განახორციელა. ავიაკომპანიის ინფორმაციით, აღნიშნულ მარშრუტზე ხომალდმა 100%-იანი დატვირთულობით იფრინა.
SkyUp-მა სამომავლოდ 5 ერთეულ Boeing 737 MAX-ზე გააკეთა შეკვეთა, რომლის ღირებულებაც 624 მლნ დოლარია.
შეკვეთა ორ ერთეულ Boeing 737 MAX 8-სა და სამ ერთეულ Boeing 737 MAX 10-ს მოიცავს, რომელსაც Boeing-ი დამკვეთს სიეტლის ქარხნიდან 2023 წლისთვის მიაწვდის.
ავიაკომპანიაში აცხადებენ, რომ მათ გეგმაშია ფრენების შესრულება თურქეთის, ეგვიპტის, ესპანეთის და სხვა მიმართულებებით და აღნიშნული მოდიფიკაციის თვითმფრინავებს შედარებით მცირე საოპერაციო ხარჯი გააჩნიათ, რაც საბოლოო ჯანზე ავიაბილეთების ფასზეც ჰპოვებს ასახვას.
