დღეიდან ბერძნულმა ავიაკომპანია ELLINAIR-მა საქართველოს მიმართულებით ფრენები განაახლა. შპს ,,საქართველოს აეროპორტების გაერთიანებასა“ და ბერძნულ ავიაკომპანია ELLINAIR-ს შორის მოლაპარაკებების წარმატებით დასრულების შედეგად, დღეიდან ავიაკომპანიამ სალონიკიდან თბილისის მიმართულებით რეისები განაახლა.
ავიაკომპანია თბილისი-სალონიკი-თბილისის მიმართულებით რეისებს კვირაში ერთხელ, ყოველ სამშაბათს განხორციელებს.
14 ივნისიდან კი რეისები კვირაში ორჯერ - ყოველ სამშაბათს და ხუთშაბათს შესრულდება. ერთი გზის ბილეთის ფასი 297 ლარიდან, ხოლო ორი გზის ბილეთის ფასი 591 ლარიდან დაიწყება.
14 ივნისიდან თბილისის საერთაშორისო აეროპორტიდან რეისები კუნძული კრეტას მიმართულებით დაინიშნება. ჰერაკლიონის მიმართულებით რეისები კვირაში ერთხელ, ყოველ ხუთშაბათს შესრულდება და ორმხრივი ბილეთის ფასი 765 ლარი იქნება.
ავიაბილეთის ფასში შედის:
8 კგ ხელბარგი;
20 კგ ბარგი;
კვება ბორტზე;
გამაგრილებელი და ალკოჰოლური სასმელები;
აეროპორტში რეგისტრაციის გავლა.
საქართველოს აეროპორტების გაერთიანებაში აცხადებენ, რომ საქართველოს მოქალაქეებში საბერძნეთი ერთ-ერთი პოპულარული მიმართულებაა და აღნიშნული რეისების დამატება ხელს შეუწყობს ორ ქვეყანას შორის ტურისტული პოტენციალის გაღრმავებას.
