ბათუმის ზღვისპირა ბულვარში საზაფხულო სეზონისათვის მზადება გრძელდება. საგაზაფხულო სამუშაოების ფარგლებში, ბულვარის იერსახის მოწესრიგების მიზნით, ყოველდღიურად სხვადსხვა გეგმიური სამუშაოები სრულდება.

დღეს, დილიდან ზღვისპირა ზოლში მორეცხვის გეგმიური სამუშაოები დაიწყო, რომლის ფარგლებშიც პრომინადზე არსებული საბაღე სკამები, გალვანიზირებული სანაგვე ურნები, დეკორატიული წყლის შადრევნები და მონუმენტები გაიწმინდება. მორეცხვითი სამუშაოები გეგმიურია და ყოველკვირეულად გაგრძელდება.

ბათუმის ბულვარში სპორტული მოედნების რეაბილიტაცია მიმდინარეობს. არდაგანის ტბასთან არსებულ ე.წ. "ტრანსფორმირებად“ მოედანს სრულად უტარდება სამღებრო და აღდგენითი სამუშაოები. გამოიცვლება დაზიანებული მავთულბადეები, ყვითელი და ლურჯი ფერის პლასტმასის სკამები და შეკეთდება ლითონის ღობე. პარალელურად, კეთილმოეწყობა აგრეთვე ფრენბურთისა და ფეხბურთის მოედნები. მიმდინარე სამუშაოები თვის ბოლომდე დასრულდება. სამღებრო სამუშაოები ჩაუტარდა ხიდებზე არსებულ დეკორატიულ ლითონის მოაჯირებს. ძველ ბულვარში კი დაზიანებული ფილების აღდგენა-რეაბილიტაცია ხორციელდება. ამასთანავე, ბულვარის მასშტაბით სრულად წესრიგდება გარე განათების სისტემა. ფეხით მოსიარულეთა ბილიკის გასწვრივ პალმის მინათების (ტერა) და გარე განათების ორფთიან ბოძებზე ელ.კაბელების შეცვლა და დამიწების აღდგენა მიმდინარეობს. სამუშაოებს შპს. "მეხამრიდი" ასრულებს, რომელიც 29 მაისს დასრულდება.

დამატებით, ზღვისპირა ბულვარში სხვა ტექნიკური სამუშაოები ყოველდღიურად, წინასწარ განსაზღვრული გეგმა-გრაფიკის მიხედვით განხორციელდება და ზაფხულის ტურისტულ სეზონამდე დასრულდება.