მსოფლიოში ყველაზე დიდი უბაჟო საცალო ვაჭრობის სივრცის მოწყობისთვის ინვესტორი 120 მლნ ევროს ინვესტირებას ახორციელებს და ის სტამბოლის ახალ აეროპორტში ოქტომბერის ბოლოს გაიხსნება. ახალი აეროპორტი, სტამბოლის მესამე აეროპორტითაა ცნობილი და მისი ოფიციალური გახსნა 29 ოქტომბრისთვისაა დაგეგმილი.
duty free-ს მოწყობისთვის აეროპორტის ოპერატორმა კომპანია IGA-მ უკვე გააფორმა 25 წლიანი კონტრაქტი გერმანულ Heinemann-თან და მის თურქ პარტნიორ, კომპანია Unifree-სთან.
პროექტის თანახმად, ძვირადღირებული ბუტიკები აეროპორტში 6 ათას 500 კვ/მ-ზე იქნება გადაჭიმული. თურქული წარმოების მაღაზიებს, რომლებიც ბაზრის პრინციპით იმუშავებენ, 3 ათასი კვ/მ დაეთმობა.
500 კვ/მ ფართობს საინფორმაციო ზონები დაიკავებენ.
15 ათას კვ/მ კი უბაჟო საცალო ვაჭრობის ობიექტს (duty free) დაეთმობა. დეკუსტაციის დარბაზებისთვის კი აეროპორტში 6 ათასი კვ/მ იქნება გამოყოფილი. სავაჭრო ცენტრებს კი 12 ათას 500 კვ/მ დაეთმობა.
როგორც თურქული მედია წერს, 2017 წელს duty free-ს ვაჭრობამ 1 მლრდ ევროს მიაღწია, საიდანაც გაყიდული პროდუქციის 36%-ი თამბაქოს ნაწარმზე მოდის, შემდეგ მოდის პარფიუმერია (28%) და ალკოჰოლური სასმელები (16%). ელექტრონული ტექნიკის გაყიდვების წილი duty free-ს ვაჭრობაში 11%-ს შეადგენს, ხოლო სათამაშოების - 9%-ს.
