პოლიციისთვის დაუმორჩილებლობის ბრალდებით დაკავებული "გირჩის" წევრები იაგო ხვიჩია და ვახტანგ მეგრელიშვილი პატიმრობიდან გაათავისუფლეს. ისინი დროებითი დაკავების იზოლატორში 10 დღის განმავლობაში იმყოფებოდნენ.
გათავისუფლებულები ამბობენ, რომ მათი დაკავება პოლიტიკურად მოტივირებული იყო. მათ თბილისის პოლიციის მთავარი სამმართველო რამდენიმე წუთის წინ დატოვეს.
განყოფილებასთან "გირჩის" წევრები და მხარდამჭერები არიან შეკრებილები.
2 მაისს, „გირჩის“ ოფისთან მომხდარ ინციდენტში, როდესაც პოლიცია ნარკოტიკების მოხმარების ბრალდებით პირს აკავებდა, პარტიის წევრები - იაგო ხვიჩია და ვახტანგ მეგრელიშვილი ჩაერივნენ. „გირჩის“ წევრები საქართველოს ადმინისტრაციულ სამართალდარღვევათა კოდექსის 166-ე და 173-ე მუხლებით გათვალისწინებული სამართალდარღვევისთვის დააკავეს, რაც წვრილმან ხულიგნობასა და პოლიციის მიმართ წინააღმდეგობას გულისხმობს.
