თბილისში, ღამის კლუბებში ჩატარებული სპეცოპერაციისას დაკავებულების ადვოკატებისთვის საქმის მასალები ამ დრომდე არ გადაუციათ. აღნიშნული ინფორმაცია თბილისის მთავარი სამმართველოდან გამოსვლის შემდეგ "ჯი-ეიჩ-ენს" ერთ-ერთი დაკავებულის ადვოკატმა, გიორგი ფანცუალაიამ განუცხადა.
"გამომძიებლებს საქმის მასალები არ გადმოუციათ, რადგან როგორც ისინი ამბობენ, გამოძიებას მტკიცებულებები ბოლომდე არ შეუკრიბავთ. მტკიცებულებებს ხვალ გადმოგვცემენ. შესაბამისად, საქმის მასალებს არ ვიცნობ და არ ვიცი, რა ბრალიც წაუყენეს, რამდენად საბუთდება მტკიცებულებებით. თავად დაკავებული დუმილის უფლებას იყენებს.
ჩემი დაცვის ქვეშ მყოფს ბრალი სისხლის სამართლის კოდექსის 260-ე მუხლის მე-3 და მე-5 ნაწილით წარუდგინეს. მე-3 ნაწილი მოხმარებას, მე-5 ნაწილი კი, გასაღებას გულისხმობს", - აცხადებს ფანცულაია.
ცნობისთვის, წუხელ კლუბ „ბასიანში“ და კაფე „გალერიში“ სპეცოპერაცია ჩატარდა, რის შედეგადაც დაკავებულია ნარკოტიკული საშუალების გამსაღებელი 8 პირი. კერძოდ, პოლიციის მიერ დაკავებულია: 1988 წელს დაბადებული ვ.ჟ., 1992 წელს დაბადებული ლ.მ., 1996 წელს დაბადებული ქ.მ., 1997 წელს დაბადებული მ.მ., 1995 წელს დაბადებული ბ.დ., 1994 წელს დაბადებული თ.ჩ., 1994 წელს დაბადებული ჯ.ე. და 1988 წელს დაბადებული გ.მ.
